Ministri izraelit i Kulturës, Miki Zohar, ka kërcënuar se do të ndërmarrë hapa për t’u hequr shtetësinë dy regjisorëve, Yuval Abraham dhe Rachel Szor, pas suksesit të dokumentarit të tyre “NAZA” në Festivalin e Filmit të Venecias. Dokumentari, i cili trajton luftën e Izraelit në Gaza dhe përdorimin e sistemeve të inteligjencës artificiale në operacionet ushtarake, fitoi Çmimin Special të Jurisë në festival. Në një postim të publikuar në platformën X të dielën, Zohar e cilësoi filmin si “të neveritshëm” dhe çmimin e marrë në Venecia si “tronditës”.
Ministri akuzoi dy kineastët se po dëmtojnë Izraelin “vetëm për të marrë duartrokitje nga antisemitët në mbarë botën” dhe deklaroi se veprimet e tyre “përbëjnë tradhti ndaj shtetit”.
“Si ministër i Kulturës, do të veproj menjëherë për t’ua hequr shtetësinë izraelite këtyre krijuesve të neveritshëm për tradhti ndaj shtetit”, shkroi Zohar. Dokumentari, me kohëzgjatje prej 80 minutash, trajton pretendimet për përdorimin e sistemeve të inteligjencës artificiale nga Izraeli për kryerjen e “vrasjeve masive të llogaritura” ndaj palestinezëve në Gaza, sipas përshkrimit zyrtar të Festivalit të Filmit të Venecias. Filmi u prit me një ovacion në këmbë prej rreth 25 minutash gjatë premierës së tij në festival.
