Paraqitja pa ngjyrë, barazimi i Portugalisë e madje edhe tregolëshi i Messit; Cristiano Ronaldo nuk e nisi në mënyrën më të mirë Botërorin 2026, edicioni i tij i 6 në karrierë.
Ylli i futbollit botëror është vënë në qendër të kritikave dhe këtë radhë edhe nga vetë tifozët e tij. Në moshën 41 vjeçare sulmuesi u deklarua i kthjellët për këtë Kupë Bote, por fusha dha një tjetër verdikt, madje këtë e thanë edhe vetë kundërshtarët e Republikës Demokratike të Kongos, madje pa u ardhur rrotull fjalëve.
‘Nuk përgatitëm asnjë kafaz, asnjë plan specifik për Cristiano Ronaldon me thënë të vërtetën-tha mesfushori i Lillë, Mukau-nuk është më i njëjti si dikur, kam shumë respekt për një prej futbollistëve më të mirë në histori, por është pak më i vjetër tani. Kur arrin njëfarë moshe nuk mund të bësh të njëjtat gjëra si më parë’.
Deklarata këto që padyshim nuk do t’i pëlqejë Cristiano Ronaldos e ndoshta edhe vetë trajnerit Roberto Martinez që tani ka të tjera probleme për ndeshjen e së martës kundër Uzbekistanit, një sfidë që duhet fituar patjetër. Edhe trajneri i Portugalisë ka përfunduar në shënjestrën e kritikave për mungesën e guximit për të zëvenësuar Ronaldon në fushën e lojës. ‘Po shohim të njëjtën ndeshje? Pati frikë të nxirrte Ronaldon nga fusha e lojës, nuk bën kështu një trajner-ishte një ndër opinionet që është dhënë më shpesh në Portugali.
Gjithsesi, duket e vështirë që në ndeshjen me Uzbekistanin, kapiteni i Portugalisë ta nisë nga stoli, por nëse edhe në këtë sfidë do të shohim kopjen e zbehtë të Cristiano Ronaldo, rrugëtimi i tij në këtë botëror do të jetë një malore e vërtetë.
