Ministria e Punëve të Brendshme ka dorëzuar kallëzim kundërvajtës ndaj tifozit 33-vjeçar F.F., i cili pas ndeshjes mes KF Pobeda dhe Shkëndijës së Haraçinës në Prilep, ka hyrë me dhunë në zhveshtoren e futbollistëve mysafirë dhe ka dëmtuar pronë të stadiumit “Goce Dellçev”.
Sipas MPB-së, veprimi i tij përbën shkelje të Ligjit për Parandalimin e Dhunës, që parashikon gjoba nga 500 deri në 1.000 euro.
Ndërkohë, FFM ka ndëshkuar klubin Pobeda me 3.000 euro dhe ndalim të publikut në 4 ndeshje.
Megjithatë, MPB nuk ka ngritur kallëzime për rastet e thirrjeve raciste të ndodhura në Kumanovë dhe Kavadar gjatë ndeshjeve të verës, duke thënë se janë në proces të identifikimit të personave të përfshirë.
