Fjalimi i fundit i Putinit nuk ofroi zbulime dhe pak ndryshime në ankesat e tij të zakonshme. Edhe një herë ai i përsëriti gënjeshtrat e tij se “një regjim neo-nazist e ka pushtuar qeverinë ukrainase” dhe se Rusia është detyruar të mbrohet kundër Perëndimit të poshtër dhe skemës së tij për ta kapur “pushtetin e pakufizuar”. Edhe zyrtarët e lartë të ulur në audiencën përballë tij në sallën e madhe dukeshin të mërzitur. “Blah, bla, bla, nuk ka kuptim të dëgjosh më tej”, thotë Igor Girkin, komentator i shquar ushtarak rus dhe nacionalist i betuar
Në fjalimin e tij për gjendjen e kombit, lideri rus shpërtheu të njëjtat deluzione për Ukrainën si një vit më parë. Një vit më parë Vladimir Putin mbajti një fjalim përmes të cilit e bëri të qartë se kishte vendosur të shkonte në luftë kundër Ukrainës. Në tiradën pothuajse një orëshe të presidentit rus më 21 shkurt të vitit 2022, ai pretendoi se Ukraina nuk kishte histori të “shtetësisë së mirëfilltë”, se ishte reduktuar në një “koloni me një regjim kukull” dhe se po transformohej në një “Trapolinë” për Perëndimin për ta sulmuar Rusinë. Gjatë atij fjalimi Putin e akuzoi qeverinë në Kiev për kryerjen e “gjenocidit” kundër qytetarëve rusishtfolës të Ukrainës lindore dhe pretendoi se nuk i kishte mbetur zgjidhje tjetër veçse të vepronte. Tri ditë më vonë ai e nisi sulmin e tij në shkallë të gjerë. Kur Putin u kthye në podium për të mbajtur fjalimin e tij për gjendjen e kombit në Moskë tri ditë më parë (21 shkurt), ai dukej një figurë e zvogëluar në disa aspekte.
Ndërkohë që fjalimi i tij gjakderdhës i një viti më parë u mbështet nga kërcënimi i forcave të armatosura në dukje të frikshme ruse, të cilat kishin kryer operacione të suksesshme në Siri dhe e kishin marrë Krimenë nga Ukraina, 12 muajt e fundit i kanë shpërfaqë kufijtë e fuqisë ushtarake ruse. Reputacioni i mëparshëm i Putinit si një strateg mjeshtër (i cili nuk u mbështet kurrë nga një ekzaminim i afërt i fakteve) është dëmtuar kundër realitetit të gabimeve të tij të përsëritura.
Njësoj, pretendimi i tij për ta rivendosur stabilitetin dhe për ta rindërtuar ekonominë ruse pas poshtërimit të rënies sovjetike është shkatërruar nga vendimi i tij për ta zhytur vendin në një luftë të pafitueshme. Konflikti i tij e ka gjunjëzuar ekonominë ruse dhe i ka detyruar qindra mijëra qytetarë rusë të luftojnë dhe në shumë raste të vdesin për ambiciet e tij.
Fjalimi i fundit i Putinit nuk ofroi zbulime dhe pak ndryshime në ankesat e tij të zakonshme. Edhe një herë ai i përsëriti gënjeshtrat e tij se “një regjim neo-nazist e ka pushtuar qeverinë ukrainase” dhe se Rusia është detyruar të mbrohet kundër Perëndimit të poshtër dhe skemës së tij për ta kapur “pushtetin e pakufizuar”. Edhe zyrtarët e lartë të ulur në audiencën përballë tij në sallën e madhe dukeshin të mërzitur. “Blah, bla, bla, nuk ka kuptim të dëgjosh më tej”, thotë Igor Girkin, komentator i shquar ushtarak rus dhe nacionalist i betuar, në llogarinë e tij në Telegram gjatë fjalimit. “Ok, është e qartë: operacioni special ushtarak do të vazhdojë në mënyrën e tanishme të paqartësisë. Lufta apo edhe operacioni kundër terrorizmit nuk është shpallur dhe nuk do të shpallet”. Girkin, i cili është dënuar për vrasje në mungesë në Holandë për shkatërrimin e një avioni civil mbi Ukrainë në vitin 2014, është një nga një grup i zëshëm i blogerëve nacionalistë në Rusi që i kanë kërkuar Putinit ta shpallë zyrtarisht luftën dhe të intensifikojë agresionin e tij kundër Ukrainës.
Në vend të kësaj, Putini përsëriti kërcënimet e tij bërthamore ndaj Perëndimit, duke njoftuar se ai kishte dhënë urdhër që forcat strategjike ruse me bazë tokësore të vendoseshin në “detyrë luftarake” dhe ta pezullonin pjesëmarrjen në traktatin e Fillimit të Ri (New Start), traktati i fundit i mbetur i kontrollit të armëve strategjike midis Rusisë dhe SHBA. Ai paralajmëroi se nëse SHBA do ta kryente një provë bërthamore, atëherë këtë do të bënte edhe Rusia, duke kërcënuar fillimin e një gare të re të armëve bërthamore. “Kjo është një kohë e ndryshimeve radikale, të pakthyeshme në të gjithë botën,” deklaroi Putin, “e ngjarjeve historike vendimtare që do ta përcaktojnë të ardhmen e vendit tonë dhe të popullit tonë”.
Mashtrimi bërthamor i liderit rus nuk është i ri. Ai e ka ndjellur kërcënimin e arsenalit bërthamor të Rusisë që nga fillimi i konfliktit në Ukrainë dhe është filmuar duke i urdhëruar forcat strategjike ruse të vendosen në një “regjim të veçantë të detyrës luftarake” më 27 shkurt 2022. Megjithatë, kjo nuk do të thotë se ky fjalim do të duhej të mos merrej parasysh dhe se kërcënimet e Putinit mund të shpërfillen. Përkundrazi, ai po sinjalizon se po dyfishohet, se ai ende beson se Perëndimi do të godasë së pari dhe se ai mund t’i rezistojë shfaqjeve aktuale të unitetit të SHBA-së dhe Evropës në mbështetje të Ukrainës. Ky fjalim kishte për qëllim t’u komunikonte qytetarëve të tij, elitës së regjimit dhe liderëve perëndimorë që dyshojnë në aftësinë e tij për ta vazhduar këtë luftë, se ai nuk e ka ndërmend të tërhiqet. (Newstateman)
