Me një investim prej 4,2 milionë euro për herë të parë blejmë automjete dhe pajisje të reja për mirëmbajtjen e higjienës në komuna. Kjo është mbështetja më e madhe deri më tani nga Qeveria për komunat në pjesën e përmirësimit të gjendjes së higjienës, theksoi zëvendëskryeministri dhe ministër i Transportit, Aleksandar Nikolloski, në punëtorinë “Plane për Mobilitet të Qëndrueshëm Urbane”.
“Po blihen 49 automjete të llojeve të ndryshme, të cilat duhet t’i ndihmojnë qytetit të Shkupit dhe komunave të tjera të përmirësojnë situatën e higjienës. Po blihen 17 automjete shumëfunksionale për mirëmbajtjen e higjienës urbane me një vlerë të përgjithshme prej 1.5 milion euro, 3 automjete shumëfunksionale për mirëmbajtjen e higjienës urbane me mekanizma përkatës me një vlerë prej 283 mijë euro, 9 kamionë të specializuar me një vlerë prej 982 mijë euro, 21 makina për pastrimin e rrugëve me një vlerë prej 1.3 milion euro, ose gjithsej 4.2 milionë euro, siç thashë, 49 automjete me mbështetjen e Bankës Botërore, të cilat do të ndihmojnë seriozisht në përmirësimin e situatës së higjienës”, tha Nikolloski.
Theksoi se ky është cikli më i madh i investimeve në komuna dhe paralajmëroi se aktivitete të tilla do të vazhdojnë edhe në periudhën e ardhshme.
“Tashmë po bisedojmë me Bankën Botërore, javën tjetër misioni i tyre është këtu për projekte të reja që do të synojnë përmirësimin e situatës në komuna, sigurisht, projekte të tjera në të cilat do të punojmë së bashku”, deklaroi zëvendëskryeministri Nikolloski.
