Shefja e deputetëve të Lëvizjes Vetëvendosje, Mimoza Kusari-Lila, ka thënë se të enjten do të mbahet seancë e re, me ç’rast do të raportojë kryeministri Albin Kurti për takimin në Ohër mes presidentit serb, Aleksandër Vuçiq, në kuadër të dialogut të nivelit të lartë mes të dyja vendeve.
Kusari-Lila ka thënë se paraprakisht do të hidhen për votim tri marrëveshjet ndërkombëtare, të cilat dështuan të miratohen seancën e kaluar.
“Të enjtet do të mbahet seancë plenare, ku do të hidhen për votim tri marrëveshjet ndërkombëtare që mbetën nga seanca e kaluar. Dita e enjte do të fillojë me votimin e këtyre marrëveshjeve dhe më pastaj raportimi i kryeministrit për takimin në Ohër”, tha Kusari-Lila.
Kusari-Lila, gjithashtu, njoftoi se edhe të mërkurën do të ketë seancë, ku në rend dite janë pikat e papërfunduara nga seancat e kaluara.
Ndërsa, e pyetur se cili do të jetë qëndrimi i grupit parlamentar të LVV-së në rast se marrëveshja për normalizimin e marrëdhënieve me Serbinë do të votohet në Kuvend, Kusari-Lila theksoi se paraprakisht duhet të nënshkruhet një marrëveshje.
“Për t’u sjellë marrëveshja në Kuvend, duhet të ketë marrëveshje të nënshkruar. Në Ohër ka pasur dakordim në parim, deri më tash nuk ka material për t’u sjellë në Kuvend. Nëse sjellët në Kuvend, do ta shqyrtojmë materialin”, ka deklaruar Kusari-Lila.
Kusari, më tej, ka theksuar se në Ohër ka pasur një marrëveshje parimore, ndërsa plani i mëtutjeshëm mbetet për t’u parë.
Bashkimi Evropian e ka quajtur si shumë të suksesshëm takimin e 18 marsit në Ohër, mes kryeministrit Kurti dhe presidentit Vuçiq.
BE-ja ka thënë se të palët janë pajtuar për zbatimin e Marrëveshjes drejt normalizimit të marrëdhënieve mes tyre, të mbështetur nga BE-ja.
Por, edhe kësaj radhe nuk kanë munguar interpretimet e ndryshme të palëve rreth asaj se çfarë marrëveshje është arritur.