Ushtria izraelite thotë se ka filluar “operacione të gjera tokësore” në të gjithë Gazën, teksa lëshoi një urdhër evakuimi të dielën në mbrëmje për disa zona, duke i paralajmëruar se do të përballen me sulme.
Forcat Mbrojtëse Izraelite (IDF) nisën sulme ajrore në vende të caktuara, përfshirë një spital në veri të Gazës, të dielën, si pjesë e një ofensive të re të quajtur Operacioni “Qerrja e Gideonit”.
Izraeli thotë se synon të lirojë pengjet e mbajtura në Gaza dhe të mposhtë Hamasin, raporton BBC.
Sulmet kanë goditur qytetin jugor të Khan Younis, si dhe qytete në veri të Gazës, duke përfshirë Beit Lahia dhe kampin e refugjatëve Jabalia, thanë ekipet e shpëtimit.
Të paktën 67 persona janë vrarë dhe 361 të tjerë janë plagosur në Gaza në 24 orët e fundit, tha ministria e shëndetësisë e drejtuar nga Hamasi.
Mbrojtja civile, shërbimi kryesor i emergjencës në Gaza, tha se kampi al-Mawasi në jug, ku ishin strehuar persona të zhvendosur, u sulmua gjithashtu gjatë natës të shtunën duke çuar në 22 të vrarë dhe 100 të plagosur.
