Rezultatet e vizitës të përfaqësuesit të posaçëm të Bashkimit Evropian për dialogun Kosovë-Serbi, Miroslav Lajçak, gjatë kësaj jave në Prishtinë dhe Beograd, nga analistët politikë vlerësohen se do të jenë minimale në dialog. Sipas tyre, pranimi nga Lajçak se ka pak përparim në normalizimin e marrëdhënieve Kosovë-Serbi, tregon se procesi i dialogut ka hyrë në një krizë të re, veçmas, siç thonë kur pas pesë muajsh do të mbahen zgjedhjet e reja në Bashkimin Evropian. Sipas analistëve dialogu do të ketë shumë paqartësi më të mëdha nëse në BE, fiton e djathta ekstreme, ndërkaq në SHBA, Donald Trump.
“Nëse presim që Kosova dhe Serbia të pajtohen shpejt për një marrëveshje që do të ishte shprehje e vullnetit politik të tyre, atëherë kjo do të zgjasë pambarimisht. Serbia është e interesuar që të vonojë procesin e konsolidimit të shtetit të Kosovës dhe natyrisht që gjëja me rëndësishme është që të pengojë anëtarësimin e Kosovës në mekanizma ndërkombëtarë. Një ndër to është Këshilli i Evropës, por edhe mekanizma të tjerë si Bashkimi Evropian dhe NATO. Natyrisht për aq kohë sa Serbia e ka këtë qasje, kërkohet nga Kosova që të gjejë një rrugë tjetër për të forcuar dhe konsoliduar shtetësinë e saj”, theksoi Dorajet Imeri, analist politik.
Lajçak gjatë kësaj jave qëndroi në Kosovë dhe Serbi. Pas takimit me kryeministrin Albin Kurti, tha se ka pak përparim në normalizimin e marrëdhënieve Kosovë-Serbi, derisa bëri të ditur se blloku evropian do të marrë një vendim se çfarë hapash do të ndërmarrin në procesin e dialogut.
