Vendet europiane si dhe ato arabe kundërshtojnë planin e presidentit amerikan Donald Trump për shpërnguljen e palestinezëve nga Gaza.
Mes indinjatës rreth propozimit, presidenti francez Emmanuel Macron për CNN në një intervistë ka bërë thirrje për respekt për palestinezët dhe fqinjët e tyre arabë.
“Nuk mund t’u thuash 2 milionë njerëzve, tani ju duhet të lëvizni. Qasja e duhur nuk është një operacion i pasurive të paluajtshme, por një operacion politik”, tha Macron.
Macron tha se çdo përgjigje “efikase” për rindërtimin e Gazës “nuk do të thotë se duhet t’ju mungojë respekti për njerëzit”, duke theksuar dëshirat e palestinezëve për të qëndruar në atdheun e tyre dhe mosgatishmërinë e Jordanisë dhe Egjiptit për të pranuar një numër të madh refugjatësh nga Gaza.
Ndërkaq Mbreti Abdullah II i Jordanisë hodhi poshtë propozimin e Presidentit Trump. Gjatë një takimi me dyer të mbyllura me presidentin amerikan në Shtëpinë e Bardhë pas takimit fillestar, monarku i Jordanisë përsëriti qëndrimin kundër zhvendosjes së palestinezëve në Gaza dhe Bregun Perëndimor.
“Ky është qëndrimi i unifikuar arab. Rindërtimi i Gazës pa zhvendosur palestinezët dhe adresimi i situatës së rëndë humanitare duhet të jetë prioritet për të gjithë”, tha ai në një postim në rrjetet sociale pas takimit.
Deklarata e tij erdhi disa orë Trump këmbënguli se Shtetet e Bashkuara kishin autoritetin për të marrë kontrollin e Gazës, pjesë e një përpjekjeje për t’i bërë presion liderit të Jordanisë dhe vendeve të tjera arabe për të përqafuar një largim të detyruar të palestinezëve.
