Nënkryetarja e Partisë Demokratike të Kosovës, Vlora Çitaku, i është kundërpërgjigjur kryeministrit Albin Kurti i cili në seancën e Kuvendit ka thënë se kur opozita takon të dërguarin e SHBA-së, Gabriel Escobar, “t’ia thotë të njëjtat fjalë me të njëjtin zell, siç m’i thonë mua, edhe atij”.
Çitaku i ka thënë Kurtit ta paramendojë se kur darkon me emisarin special të BE-së, Miroslav Lajçak, i ka përballë edhe qytetarët, të cilëve, siç thotë, u ka thënë zëshëm “Zajednica nuk kalon”.
“Ndërkohë, kur ju të darkoni me Lajçakun, paramendoni që i keni përballë qytetarët të cilët ua kanë dhënë votën. Po ata qytetarë të cilëve u keni thënë zëshëm ‘Zajednica nuk kalon’ “, ka shkruar ajo në Facebook.
Çitaku ka këmbëngulur se qëndrimi i PDK-së për dialogun ka qenë konsistent, “dhe atë çfarë duhet ta përmbajë marrëveshja përfundimtare, njohjen reciproke”.
https://www.koha.net/arberi/365001/kuvendi-mban-seance-plenare/
