Carousel më i avancuar: Instagram lejon captions për çdo slide

Instagram ka prezantuar një funksion të ri që ndryshon mënyrën se si përdoruesit krijojnë postime me shumë foto ose video, të njohura si “carousel”.

Deri tani, çdo postim i tillë kishte vetëm një përshkrim të vetëm për të gjitha imazhet. Me përditësimin e ri, përdoruesit mund të shtojnë përshkrime të veçanta për çdo foto ose video brenda të njëjtit postim, duke i dhënë më shumë kontekst secilës pjesë veçmas.

Ky funksion i ri u jep më shumë fleksibilitet krijuesve të përmbajtjes, bizneseve dhe mediave, të cilët mund ta përdorin për udhëzime hap pas hapi, albume udhëtimesh, prezantime produktesh apo seri përmbajtjesh ku çdo imazh ka mesazhin e vet.

Përdoruesit mund të zgjedhin mes dy opsioneve: një përshkrim të vetëm për të gjithë postimin ose disa përshkrime individuale për çdo “slide”. Aktivizimi bëhet gjatë krijimit të postimit përmes opsioneve të reja të platformës.

Sipas ekspertëve të rrjeteve sociale, ky ndryshim e bën formatin “carousel” më të ngjashëm me një rrëfim të ndarë në kapituj, duke rritur angazhimin dhe mënyrën e komunikimit me ndjekësit.

Funksioni po shpërndahet gradualisht tek përdoruesit në mbarë botën.