Vazhdimi i seancës konstituive të Kuvendit të Kosovës është caktuar të mbahet të mërkurën në orën 11:00.
Ky zhvillim vjen pas aktgjykimit të Gjykatës Kushtetuese, i publikuar të hënën, e cila sqaroi se kryetari i Kuvendit duhet të zgjidhet përmes votimit të hapur dhe brenda një afati 30-ditor, që fillon të llogaritet nga e marta.
Në vendimin e Kushtetueses theksohet se kalimi në votim të fshehtë, siç kishte insistuar Lëvizja Vetëvendosje, nuk ka pasur mbështetje nga subjektet e tjera parlamentare. Për këtë arsye, kryesuesi i seancës është urdhëruar që të vazhdojë me pikën 3 të rendit të ditës – procedimin e zgjedhjes së kryeparlamentarit.
Ndërkohë, Kushtetuesja nuk ka specifikuar pasojat e mundshme juridike në rast se Kuvendi nuk arrin të konstatohet brenda afatit të përcaktuar.
