Imunizimi me dozën e tretë të vaksinës kundër Kovid19 për shumë qytetarë është e pranueshme si shpresë për stabilizimin e tërësishëm të situatës. Megjithatë për një pjesë tjetër doza e tretë nuk fare e arsyeshme, kur një pjesë e madhe e qytetarëve akoma nuk e kanë marrë dozën e parë.
“ A do e merrni dozën e tretë të vaksinës? Jo”.
“ Kam marrë dy vaksina, do ta marrim patjetër edhe të tretën nëse duhet”.
“ Nuk e di, tani sa e kam marrë dozën e parë tani pres ta marr të dytën. Për të tretën nëse ka nevojë patjetër ta marrim”.
“ Unë mora dy doza tani, ndërsa të tretën nuk mendoj ta marr. E kam kaluar virusin, I kam marrë dy doza, nuk ka nevojë”.
“ Unë i kam marrë dy dozat. Patjetër ta marrim dhe dozën e tretë ë të mbrohemi nga virusi korona, ashtu thonë se krijon imunitet”.
“ Patjetër. Kam marrë dy doza, do ta marr dhe të tretën kur të më vijë radha”.
“ Unë kam marrë dy vaksina dhe deri tash jam super. Do e kisha pranuar dhe të tretën, pse jo? Patjetër të jetojmë. Nëse duam jetë dhe të mos vuajnë tjerët për shkakun tonë duhet të vaksinohemi patjetër”.
Një ditë më parë Komisioni i imunizimit njoftoi se doza e tretë e vaksinës mund të merret nga çdo qytetarë, 6 muaj pas marrjes së dozës së dytë. Deri më tani dozën e tretë të vaksinës kundër Kovid në Maqedoninë e Veriut e kanë marrë 329 qytetarë, persona të cilët bëjnë pjesë në grupin e kategorive të rrezikuara. Deri më 2 tetor, me dy doza janë vaksinuar rreth 735.000 qytetarë. Vaksinimi kundër Kovid19 në vend ka filluar më 17 mars të këtij viti. Numri më i madh i vaksinave të aplikuara janë nga prodhuesi Pfizer, ku deri më 2 tetor janë dhënë 579.909 doza, ndërkaq e dyta sipas numrit të vaksinave të aplikuara është vaksina kineze Sinovak. Më pak doza të aplikuara në vend ka nga prodhuesi Rus, Sputnik V.
