Presidenti i SHBA-së, Donald Trump tha të enjten se ai mund të përdorë forcën ushtarake kundër Iranit “tani menjëherë” nëse kërcënohen aleatët dhe anijet amerikane, transmeton Anadolu.
I pyetur gjatë një interviste për “Salem News Channel” nëse do të hezitonte të përdorte forcën për të ndaluar Iranin të “terrorizonte aleatët tanë dhe anijet tona”, ai u përgjigj: “Pa hezitim. Ne po ia dalim shumë mirë me këtë tani”.
“Por, përgjigjja është nëse do t’i shihja gjërat duke shkuar në anën tjetër, do ta bëja këtë dhe është e mundur që ta bëj tani”, shtoi ai. Trump pretendon se SHBA-ja nuk ka pësuar humbje në muajt e fundit.
“Ne nuk kemi humbur asnjë ushtar për pesë muaj dhe ne kontrollojmë Gjirin. E kontrollojmë plotësisht atë”, shtoi presidenti amerikan.
I pyetur nëse është i gatshëm të ruajë bllokadën e SHBA-së edhe nëse u deshën 26 muaj për të rrëzuar regjimin iranian, Trump tha: “Epo, regjimi po shembet dhe shtypi i tyre është shumë më ndryshe se faktet”.
“Ata kanë inflacion 301 për qind. Ekonomia e tyre është zhdukur. Ata nuk po paguajnë ushtarët e tyre. Ushtria e tyre është zhdukur. Marina e tyre ka ikur. Forcat e tyre ajrore janë zhdukur”, theksoi Trump.
Ai akuzoi zyrtarët iranianë se po flasin “me guxim të madh” për pozicionin e tyre dhe paralajmëroi se “nëse diçka nuk funksionon, nuk do të hezitoja”.
Trump paralajmëroi se Irani do të përballet me pasoja të rënda nëse vret një zyrtar të lartë amerikan, duke thënë se vendi “nuk do të ekzistojë më gjatë” në një skenar të tillë.
Presidenti amerikan u pyet gjithashtu nëse do të përfaqësojë një humbje për presidencën e tij nëse lidershipi aktual i Iranit do të mbetej në pushtet kur ai të largohej nga detyra.
“Nëse të çmendurit e Iranit janë në pushtet kur të largoheni nga detyra, a do të ishte kjo një humbje për ju, apo është thjesht diçka që nuk mund të bëhet në tre vjet?”, e pyeti pritësi Hugh Hewitt.
“Po, kjo do të ishte një humbje”, u përgjigj Trump.
