Katër senatorë amerikanë të rreshtuar me Partinë Demokratike kanë deklaruar se nuk do të pranojnë një marrëveshje për shpenzimet në fund të vitit, nëse ajo nuk kufizon mundësinë e presidentit Donald Trump për të vazhduar luftën kundër Iranit, transmeton Anadolu.
Në një deklaratë, senatorët Michael Bennet, Bernie Sanders, Chris Van Hollen dhe Tammy Duckworth thanë se “populli amerikan ka qenë i qartë, duhet t’i japim fund luftës së paligjshme dhe shkatërrimtare të presidentit Trump kundër Iranit”.
Ata deklaruan se lufta ka rritur çmimet e karburantit, produkteve ushqimore dhe plehrave kimike, si dhe theksojnë se më shumë se 20 pjesëtarë të forcave amerikane janë vrarë dhe qindra të tjerë janë plagosur, “ndërkohë që nuk është arritur asnjë nga objektivat e deklaruara të presidentit Trump dhe janë dëmtuar civilët në të gjithë rajonin”.
Me afrimin e afatit të 11 dhjetorit për financimin e qeverisë, senatorët thanë se Kongresi nuk duhet të pranojë një marrëveshje afatshkurtër që siguron “miliarda dollarë shtesë” për “luftën e zgjedhur nga Trump”.
Ata argumentuan se çdo paketë e tillë duhet të përfshijë dispozita që ndalojnë administratën të përdorë fondet e miratuara nga Kongresi për vazhdimin e luftës.
Duke iu referuar luftërave në Vietnam, Afganistan dhe Irak, ata paralajmëruan se luftërat “mund të zgjasin me dekada”, dëmtojnë ekonominë, shterojnë burimet ushtarake dhe i bëjnë amerikanët më pak të sigurt.
“Kur të votojmë për ndarjen e fondeve, synojmë të financojmë qeverinë dhe të ndalojmë financimin e kësaj lufte”, thuhet në deklaratë.
Kjo deklaratë erdhi pas një letre të demokratit Bennet, në të cilën ai u bëri thirrje kolegëve të tij në Senat të bllokojnë çdo paketë financimi që përfshin fonde shtesë për luftën.
Ndërkohë, Trump, përmes platformës së tij Truth Social, i bëri thirrje udhëheqjes së Senatit që të ndërmarrë “menjëherë” hapa për miratimin e një projektligji prej 350 miliardë dollarësh për financimin e ushtrisë, përmes procedurës së pajtimit buxhetor.
Ai pretendoi se gjatë mandatit të tij të parë e rindërtoi ushtrinë dhe se po e bën këtë “përsëri, më të madhe dhe më të mirë se kurrë më parë”.
Trump argumentoi se “shumica radikale demokrate në Kongresin e ardhshëm” e ka bllokimin e këtij investimi si “prioritetin numër një”, duke theksuar se demokratët duan t’i lënë trupat amerikane “të dobëta dhe të pambrojtura”.
“Republikanët duhet të bëjnë atë që u takon për luftëtarët tanë. Demokratët nuk do ta bëjnë kurrë këtë. Koha është tani”, deklaroi ai.
