Dëmet e shkaktuara nga lufta gjenocidale e Izraelit në Gaza kanë përkeqësuar përmbytjet e shkaktuara nga reshjet e dendura të shiut, të cilat kanë përmbytur sipërfaqe të mëdha të enklavës, bëjnë të ditur zyrtarët lokalë.
Një stuhi e fuqishme ka nxjerrë në pah se si përkeqësimi katastrofik i rrjeteve të kanalizimit të ujërave atmosferike dhe ujërave të zeza në Rripin e Gazës po shkakton përmbytjen e mijëra tendave.
Infrastruktura e Gazës është dëmtuar rëndë nga valët e sulmeve ajrore dhe bombardimeve që nga fillimi i luftës, në tetor të vitit 2023.
Ramadan Rabaa, pronar i një dyqani palestinez, pa se si ujërat e përmbytjes depërtuan në lokalin e tij në pjesën perëndimore të qytetit të Gazës, duke shkatërruar sasi të mëdha mallrash dhe duke shkaktuar humbje të konsiderueshme financiare për biznesin e tij dhe të fqinjëve.
Kur ekipet komunale mbërritën në vendngjarje, mundësitë e tyre për të ndihmuar ishin shumë të kufizuara për shkak të mungesës së madhe të pajisjeve dhe makinerive.
Rabaa beson se, nëse autoritetet komunale do të kishin burime të mjaftueshme, si kamionë për thithjen e ujit, pompa dhe buldozerë, humbjet e tij do të mund të ishin minimizuar. Kjo potencialisht do të kishte shpëtuar dyqanin e tij, si dhe biznese të tjera, shtëpi dhe tenda që u përmbytën.
Sipas Zyrës së Mediave të Qeverisë së Gazës, reshjet kanë përmbytur ose dëmtuar 70 mijë tenda, duke prekur rreth 350 mijë njerëz. Në disa kampe të të zhvendosurve, niveli i ujit ka arritur pothuajse 1.5 metra.
Pasojat e motit të keq janë rënduar edhe më shumë nga shkatërrimet e luftës. Zyra e Mediave raporton se më shumë se 700 kilometra të rrjetit të kanalizimit në Gaza janë shkatërruar.
Brenda 12 orëve nga fillimi i stuhisë, Mbrojtja Civile e Gazës pranoi më shumë se 2 mijë thirrje për ndihmë, por arriti t’u përgjigjej vetëm 218 prej tyre, për shkak të mungesës së karburantit dhe defekteve të pajisjeve.
Për shkak të rrethimit të vazhdueshëm të Gazës dhe shkatërrimeve të shkaktuara nga lufta e Izraelit, Komuna e qytetit të Gazës aktualisht disponon vetëm një buldozer, i cili shpesh pëson defekte, dhe dy kamionë për thithjen e ujit. Shumica e pompave të ujit dhe të kanalizimeve janë jashtë funksionit.
“Komuna ka humbur rreth 85 për qind të flotës së automjeteve dhe pajisjeve të rënda gjatë luftës, pasi pushtimi izraelit ka shkatërruar më shumë se 135 automjete, makineri dhe pajisje, duke i lënë në dispozicion vetëm 15 për qind të flotës që kishte më parë”, deklaroi për Al Jazeera Husni Muhanna, zëdhënës i Komunës së qytetit të Gazës.
“Makineritë e mbetura janë të vjetra dhe të amortizuara, pësojnë defekte të shpeshta dhe kërkojnë mirëmbajtje të vazhdueshme për të qëndruar në funksion dhe për t’u ofruar banorëve dhe të zhvendosurve nivelin minimal të shërbimeve. Për këtë arsye, komuna detyrohet të kërkojë ndihmë nga çfarëdo burimesh që janë në dispozicion në sektorin privat”, shtoi ai.
Shkatërrimet kanë prekur edhe rrjetet e kullimit të ujërave.
“Pushtimi ka shkatërruar gjashtë nga tetë pompat e ujërave të zeza në qytetin e Gazës. Deri më tani, komuna nuk ka arritur të rikthejë në funksion më shumë se dy pompa, duke bërë që kapaciteti i kullimit të bjerë në rreth 20 për qind në rastin më të mirë”, tha Muhanna.
Situata është përkeqësuar edhe nga shkatërrimi i rrjetit të kullimit të ujërave atmosferike. Qyteti i Gazës ka humbur rreth 2.800 nga 4.800 pusetat dhe kanalet e kullimit që kishte para luftës, duke rritur rrezikun e përmbytjeve gjatë reshjeve të dendura.
Muhanna paralajmëroi se sfidat me të cilat përballet qyteti i Gazës janë përtej kapaciteteve të ekipeve komunale. Rreth një milion banorë dhe persona të zhvendosur janë përqendruar në një territor që përfshin më pak se një të tretën e sipërfaqes së qytetit, ndërsa 85 për qind e infrastrukturës është dëmtuar.
Për t’iu përgjigjur situatës, komuna dhe institucionet lokale kanë përgatitur një plan emergjent për dimrin, i cili kërkon materiale dhe pajisje për terren në vlerë prej 1.3 milionë dollarësh. Megjithatë, zbatimi i tij varet tërësisht nga sigurimi i financimit dhe furnizimeve, të cilat po pengohen nga kufizimet izraelite ndaj Gazës.
Jibril Kashko, një biznesmen nga një familje që merret me pajisje të rënda, i tha Al Jazeera-s se Komuna e qytetit të Gazës kishte kërkuar ndihmën e tij gjatë stuhisë së fundit, por mundësitë e tij për të ndihmuar ishin të kufizuara për shkak të pajisjeve të dëmtuara dhe mungesës së burimeve të nevojshme për funksionimin e tyre.
“Ajo me të cilën përballen pronarët e pajisjeve të rënda në Gaza shkon përtej defekteve të zakonshme. Ata tashmë nuk janë në gjendje të sigurojnë as materialet më elementare për funksionimin e tyre, nga pjesët rezervë, vaji dhe yndyrat lubrifikuese, deri te bateritë”, tha Kashko.
Ismail al-Thawabta, drejtor i përgjithshëm i Zyrës së Mediave të Qeverisë së Gazës, tha se enklava ka nevojë për 300 mijë deri në 350 mijë tenda dhe mbulesa plastike të përforcuara, si dhe për shtëpiza të parafabrikuara, për të zëvendësuar strehimet e dëmtuara.
Shtëpitë e lëvizshme, të cilat duhej të hynin në Gaza në kuadër të marrëveshjes së armëpushimit të tetorit 2025, janë bllokuar në kufi.
Gaza ka nevojë gjithashtu për 1.000 deri në 1.500 pompa uji, 300 deri në 500 makineri të rënda, si buldozerë dhe ekskavatorë, si dhe gjeneratorë për furnizimin me energji të shërbimeve thelbësore.
Al-Thawabta tha se zhvendosjet e përsëritura dhe shkatërrimi i shumicës së shtëpive në Gaza kanë bërë që një numër i madh banorësh të mos kenë pajisjet dhe furnizimet elementare për t’u përballur me muajt e dimrit.
Ai theksoi se për t’i ndihmuar palestinezët në Gaza të përballojnë motin e keq, nevojiten 2.2 milionë pako me veshje dimërore, 5 milionë batanije të trasha, 2 milionë dyshekë sfungjeri që izolojnë nga uji dhe lagështia, si dhe rreth 400 mijë ngrohëse.
Megjithatë, për shkak të kufizimeve izraelite, ndihmat që hyjnë në Gaza vazhdojnë të përbëjnë vetëm një pjesë të vogël të asaj që i nevojitet popullsisë prej 2.3 milionë banorësh të enklavës.
