Kryetari i LSDM-së, Venko Filipçe, ka kritikuar kryeministrin Hristijan Mickoski lidhur me situatën në Alta Bankë, duke pretenduar se qytetarët dhe kompanitë po përballen me pasoja të drejtpërdrejta, përfshirë kufizimet në tërheqjen e parave të tyre.
Duke folur në televizionin Sitel, Filipçe ngriti shqetësimin për pensionistët që presin para degës së bankës në Manastir dhe për kufizimin e tërheqjes së mjeteve.
“Si do t’ua shpjegoni tani pensionistëve që presin në radhë para Alta Bankës në Manastir? Apo se mund të marrin vetëm dhjetë mijë denarë nga paratë e tyre dhe se atë bankë ua solli Hristijan Mickoski?”, deklaroi Filipçe.
Ai theksoi se pasojat e situatës po i përballojnë qytetarët dhe kompanitë, ndërsa përgjegjësinë politike për këtë situatë ia atribuoi kryeministrit Mickoski.
Filipçe rikujtoi se, sipas tij, LSDM kishte paralajmëruar që nga dhjetori i vitit të kaluar për Alta Bankën dhe dyshimet lidhur me origjinën e kapitalit të saj.
“Një bankë që nga një zyrë këmbimi valutor u shndërrua në bankë, një bankë që dyshohet se ka kapital të madh të fituar përmes marrëveshjeve kriminale dhe korruptive në Serbi, që dyshohet se pastron para përmes trafikut të drogës, u lejua të hynte në vendin tonë”, tha Filipçe.
