Kryeministri britanik Andy Burnham tha sot se rezultatet e zgjedhjeve afatmesme në SHBA ofruan mundësi për të bashkuar përpjekjet ndërkombëtare për të zgjidhur konfliktin në Lindjen e Mesme dhe për të lehtësuar presionet e kostos së jetesës, transmeton Anadolu.
Duke folur për transmetuesit në margjinat e Takimit të Kryetarëve të Qeverive të Commonwealth-it, Burnham përshëndeti pranimin e rezultateve të zgjedhjeve nga presidenti amerikan Donald Trump pas humbjeve republikane.
“Epo, presidenti Trump i ka pranuar rezultatet dhe unë ndjej se bota tani ka mundësi për t’u bashkuar rreth çështjes që po na prek të gjithëve dhe kjo është kostoja e jetesës”, tha ai.
Burnham tha se trajtimi i rritjes së kostove të jetesës ka qenë prioritet gjatë tre muajve të tij të parë në “Downing Street”, por theksoi se zgjidhja e konfliktit në Lindjen e Mesme është thelbësore për reduktimin e presionit mbi familjet.
“Kjo ka qenë çështja që kam vënë në qendër të vëmendjes në tre muajt e mi të parë në ‘Downing Street’ dhe ne kemi bërë lëvizje, por nuk mund të ulim presionet e kostos së jetesës së njerëzve derisa të zgjidhet konflikti në Lindjen e Mesme”, tha ai.
Kryeministri britanik tha se do të “punojë për de-përshkallëzimin” dhe shprehu shpresën se ngushtica e Hormuzit do të rihapet. “Njerëzit duan të shohin botën të bashkohet dhe të fokusohet në gjërat që kanë rëndësi për njerëzit – dhe kjo është ajo që votuesit, sipas meje, thonë në SHBA”, tha ai.
Demokratët fituan kontrollin e Dhomës së Përfaqësuesve dhe Senatit në zgjedhjet afatmesme të së martës, duke i dhënë fund kontrollit republikan të Kongresit. Rezultatet pritet t’u japin demokratëve fuqi më të madhe për të bllokuar axhendën legjislative të Trumpit.
Republikanët kanë mbajtur më parë shumicë të ngushtë në të dyja dhomat.
