Dyzet vjet pas katastrofës bërthamore të Çernobilit, shkencëtarët po studiojnë grimcat radioaktive të çliruara gjatë shpërthimit për të kuptuar se çfarë ka mbetur nga materiali bërthamor dhe në çfarë gjendjeje ndodhet sot.
Sipas raportimit të Science Alert, studimi i qëndrueshmërisë së këtyre grimcave është i rëndësishëm për të kuptuar rreziqet afatgjata të ndotjes radioaktive, si dhe për të përmirësuar sigurinë e centraleve bërthamore në të ardhmen.
Analizat kanë zbuluar se grimcat e pluhurit radioaktiv kanë një strukturë jashtëzakonisht të qëndrueshme, shumë më tepër nga sa ishte menduar më parë. Kjo nënkupton se një pjesë e madhe e materialit radioaktiv mund të mbetet e bllokuar brenda tyre edhe pas dekadash ekspozimi ndaj faktorëve mjedisorë.
Hulumtimi u realizua nga studiues të Universitetit Leibniz në Hanover dhe të qendrës kërkimore gjermane Helmholtz-Zentrum Dresden-Rossendorf (HZDR).
Gjetjet janë publikuar në revistën shkencore Journal of Hazardous Materials dhe mund të ndihmojnë në vlerësimin më të saktë të rreziqeve që vazhdojnë të paraqesin mbetjet radioaktive të Çernobilit.
Megjithatë, qëndrueshmëria e grimcave nuk do të thotë se zona e Çernobilit është e sigurt për t’u vizituar pa masa mbrojtëse. Vlerësimi i rrezikut kërkon analiza të mëtejshme të ndotjes dhe të kushteve konkrete në terren.
