Franca ka pezulluar përdorimin e granatave trullosëse nga policia gjatë protestave të nxënësve, pasi një 15-vjeçar humbi dorën gjatë një incidenti në qytetin Lens në veri të vendit.
Ministri i Brendshëm, Laurent Nuñez, tha se kishte kërkuar pezullimin e përdorimit të këtyre mjeteve derisa të sqarohen plotësisht rrethanat e incidentit të së hënës. Autoritetet dhe protestuesit kanë dhënë versione të ndryshme për mënyrën se si ndodhi ngjarja.
Sipas autoriteteve, i riu e kishte marrë në dorë granatën, e cila më pas shpërtheu. Nxënës të tjerë, megjithatë, pretendojnë se ai u godit drejtpërdrejt nga granata e hedhur nga një efektiv policie.
Incidenti ndodhi pranë shkollës së mesme Auguste-Béhal në Lens, ndërsa policia ishte përballur me një grup prej rreth 200 deri në 250 nxënësish, të cilët, sipas prefekturës lokale, po hidhnin gurë dhe fishekzjarrë drejt forcave të rendit.
Nuñez tha për radion RTL se Inspektorati i Përgjithshëm i Policisë Kombëtare, IGPN, ka hapur 18 hetime për të përcaktuar nëse veprimet e policisë gjatë protestave kanë qenë proporcionale, transmeton Telegrafi.
“Ka një veprim policor që na ngre pikëpyetje të gjithëve në Ministrinë e Brendshme; bëhet fjalë për atë që ndodhi në Lens”, tha ai, duke konfirmuar se përdorimi i granatave do të pezullohet derisa të qartësohen rrethanat e incidentit.
Granatat në fjalë konsiderohen armë me rrezik më të ulët vdekjeprurës, por mund të shkaktojnë dëmtime serioze. Franca i ka përdorur ato si pjesë të mjeteve për shpërndarjen e turmave.
Protestat e nxënësve kanë vazhduar të mërkurën, ndërsa më shumë se 500 shkolla janë mbyllur plotësisht ose pjesërisht. Ministria franceze e Arsimit tha se 528 nga rreth 3,700 lice ishin të prekura nga ndërprerjet.
Qindra mijëra njerëz dolën në rrugë të martën për të kërkuar përmirësimin e kushteve në shkolla. Në disa qytete pati përleshje me policinë, e cila përdori gaz lotsjellës dhe topa uji.
Ministria e Brendshme tha se 488 persona u arrestuan, ndërsa 43 pjesëtarë të forcave të sigurisë u lënduan gjatë protestave të së martës.
Kryeministri Sébastien Lecornu pritet të mbajë një fjalim mbrëmjen e së mërkurës, në një kohë kur protestat janë përhapur nga nxënësit e shkollave të mesme te prindërit, studentët universitarë dhe sindikatat.
Rasti i 15-vjeçarit në Lens nuk është incidenti i vetëm që ka shtuar shqetësimet për mënyrën se si policia po përballet me protestuesit e rinj.
Javën e kaluar, një tjetër nxënës 14-vjeçar u godit në fytyrë nga një granatë me gaz lotsjellës në Saint-Ouen-l’Aumône, në veriperëndim të Parisit. Avokati i tij tha se i riu kishte humbur disa dhëmbë dhe kishte pësuar frakturë të nofullës. Një polic është ngarkuar me akuza lidhur me incidentin.
Ndërkohë, prokurorët njoftuan të mërkurën hapjen e një hetimi për tentativë vrasjeje, pasi një protestues 17-vjeçar pretendoi se një efektiv policie “ia kishte mbajtur kokën nën ujë” gjatë arrestimit pranë një lumi në Belfort, në verilindje të Francës.
Që nga fillimi i protestave në mesin e shtatorit, kryeministri Lecornu ka dënuar dhunën e shfaqur në disa prej tyre. Sipas shifrave të qeverisë, deri tani janë lënduar 215 nxënës, 85 pjesëtarë të stafit shkollor dhe 715 policë. Më shumë se 6,500 persona janë ndaluar ose arrestuar gjatë kësaj periudhe.
Presidenti Emmanuel Macron zhvilloi një takim urgjent të martën në mbrëmje me Lecornun dhe ministra të tjerë të rëndësishëm, pasi protestat e asaj dite prekën gati një të katërtën e të gjitha liceve në vend.
Sipas qeverisë, në demonstratat e së martës morën pjesë më shumë se 250,000 persona, ndërsa sindikatat e nxënësve e vlerësuan pjesëmarrjen në rreth 450,000.
Organizatat studentore kanë paralajmëruar një raund të katërt protestash të enjten në Paris dhe qytete të tjera.
Ryad Rani, drejtues i sindikatës së nxënësve të shkollave të mesme USL, i bëri thirrje ministrit Nuñez që të ulë tensionet.
“Po i themi z. Nuñez: qetësoni policët tuaj dhe bëni thirrje për përmbajtje”, tha ai për radion franceze RTL.
