Usain Bolt riktheu për pak ditë emocionet e garave të atletikës në Budapest, ku ishte një nga figurat kryesore të kampionatit të ri Ultimate të World Athletics. Legjenda xhamajkane foli për rikthimin në pistë, brezin e ri të sprinterëve, rekordet e tij dhe jetën pas sportit.
Bolt, i cili sot është 40 vjeç, ishte padyshim një nga personazhet më të kërkuara të aktivitetit në kryeqytetin hungarez. Rekordet e tij botërore prej 9.58 sekondash në 100 metra dhe 19.19 sekondash në 200 metra, së bashku me tetë medaljet e arta olimpike, vazhdojnë t’i japin një status të veçantë në historinë e atletikës.
“Më duket sikur jam sërish atlet”
Pas nëntë vitesh nga tërheqja e tij nga atletika, Bolt pranoi se rikthimi në pistë i solli emocione të veçanta.
“Kur dola për të ecur në vijën e finishit dhe pashë publikun që më brohoriste, ishte diçka magjike. E ndjeva atë energji të veçantë. Si sportist, të mungojnë ato emocione dhe adrenalina. Por tani nuk është më koha ime. Duhet t’ua lëmë skenën brezave të rinj”, u shpreh ai.
Bolt foli edhe për gjeneratën aktuale të sprinterëve dhe rivalitetin mes SHBA-së dhe Xhamajkës. Sipas tij, në vitet e fundit nuk ka pasur një dominim absolut të një vendi në sprint. Ai përmendi edhe Kishane Thompson si një nga talentet që mund të ketë sukses në të ardhmen, duke theksuar se sezoni i tij ishte i vështirë pas humbjes së trajnerit.
“Nuk bëj më parashikime”
I pyetur se kush mund të dominojë sprintin në vitet e ardhshme, Bolt ishte i prerë: “Nuk bëj parashikime. Kam hequr dorë prej tyre. Thjesht shikoj dhe shijoj garat, si gjithë të tjerët”. Ai pranoi se ndjekja e garave të 100 metrave si spektator është ende emocionuese, sidomos kur garon një atlet nga Xhamajka.
Rekordi i tij u tejkalua nga një robot
Bolt u pyet edhe për lajmet e fundit rreth robotëve humanoidë që kanë arritur një kohë më të shpejtë se rekordi i tij në 100 metra. “E pashë”, tha ai duke qeshur. “Këto janë gjëra që ndodhin sot. Me sa duket, ky është drejtimi ku po shkon bota. Mua thjesht më bëri të qesh. Por fakti që më përdorin si pikë reference tregon se sa i mirë kam qenë.”
Pavarësisht viteve që kanë kaluar nga tërheqja, Bolt thotë se e ka arritur një nga objektivat më të mëdha të karrierës së tij: të përmendet mes emrave më të mëdhenj të historisë së sportit.
“Gjithmonë kam dashur të jem mes më të mëdhenjve në historinë e sportit. Kur flitet për Muhammad Ali, Michael Jordan dhe figura të tjera të mëdha, doja që edhe emri im të ishte pjesë e asaj bisede. Mendoj se këtë ëndërr e kam realizuar”, deklaroi ai.
Bolt vlerëson kampionatin Ultimate
Për kampionatin e ri të World Athletics në Budapest, Bolt pati fjalë pozitive. “Energjia ka qenë e mrekullueshme. Mendoj se publiku e ka shijuar shumë. Muzika luan një rol të rëndësishëm për të mbajtur tifozët të angazhuar, sidomos në garat e kërcimeve. Ishte fantastike të shikoje kërcimin me shkop. Më pëlqen ajo që po ndodh. Mendoj se është një hap i mirë për atletikën”, tha ai.
Bolt theksoi gjithashtu se konkurrenca mes atletëve e bën sportin më interesant. “Është më argëtuese kur nuk e di se kush do të fitojë. Në kohën time fitoja shumë, por ndonjëherë është mirë të shohësh atletë të ndryshëm duke triumfuar. Kjo e bën sportin më emocionues”, u shpreh ai.
Çfarë mendon për paratë e mëdha në atletikë? Fituesit e garave në Ultimate morën 150 mijë dollarë. Bolt dha edhe një këshillë për sportistët e rinj që fitojnë shuma të mëdha parash.
“Varet nga mosha. Nëse je i ri dhe sapo ke nisur karrierën, mund ta shijosh. Por nëse je drejt fundit të karrierës, duhet të mendosh për investimet dhe të sigurohesh që më vonë të mos kesh nevojë të punosh shumë vetëm për të ruajtur mënyrën e jetesës”, tha ai.
“Kam tre fëmijë, ndaj jeta është e ngarkuar”
Jeta e Bolt pas sportit është larg së qenit monotone. Ai është baba i tre fëmijëve dhe vazhdon të angazhohet në aktivitete të ndryshme, përfshirë punën bamirëse dhe udhëtimet.
“Jam mirë. Po e marr më qetë, por kam një jetë të ngarkuar. Kam tre fëmijë, kështu që ka shumë punë dhe ulje-ngritje. Megjithatë, përpiqem të jem aktiv dhe të bëj shumë gjëra”, tregoi ai. Bolt tha gjithashtu se ka plane për të udhëtuar në Afrikë, një kontinent që ende dëshiron ta eksplorojë më shumë.
“Jam në formën më të mirë të jetës sime”
Në fund, legjenda xhamajkane sqaroi edhe komentet e mëparshme për gjendjen e tij fizike. “Herën e kaluar bëra një shaka dhe ju e nxorët nga konteksti. Nuk isha aq keq sa të më merrej fryma duke ngjitur shkallët. Thjesht po bëja shaka”, tha Bolt.
Dhe më pas dha mesazhin që dëshiron të mbetet titulli i historisë:
“Jam në formën më të mirë të jetës sime. Gjithmonë stërvitem. Ndonjëherë me më shumë, ndonjëherë me më pak intensitet, por shkoj rregullisht në palestër. Në Budapest u stërvita çdo ditë që nga momenti që mbërrita. Jam i kënaqur me gjendjen time fizike dhe do të vazhdoj të punoj”.
