Vlera vjetore e prodhimit industrial të industrisë së drithërave në Kinë, pritet të tejkalojë 4.5 trilionë juanë (666.8 miliardë dollarë) gjatë periudhës së Planit të 15-të Pesëvjeçar (2026-2030), deklaroi të hënën një zyrtar.
Sektori i drithërave do t’i përmbushë më mirë kërkesat e njerëzve për ushqim me cilësi më të lartë, më ushqyes dhe më të shëndetshëm, tha Liu Huanxin, kreu i Administratës Kombëtare të Ushqimit dhe Rezervave Strategjike, në një konferencë për shtyp.
Industria e drithërave në Kinë ka ruajtur një rritje të qëndrueshme vitet e fundit, ku vlera totale e prodhimit industrial të ndërmarrjeve të drithërave është rritur nga 3 trilionë juanë në fund të periudhës së Planit të 13-të Pesëvjeçar (2016-2020) në mbi 4 trilionë juanë në fund të periudhës së Planit të 14-të Pesëvjeçar (2021-2025).
Liu tha se, pavarësisht luhatjeve aktuale në tregun ndërkombëtar të drithërave, tregu kinez i drithërave ka mbetur përgjithësisht i qëndrueshëm dhe siguria ushqimore e vendit është e garantuar mirë.
Liu theksoi një parashikim të fundit të Organizatës Botërore Meteorologjike, i cili tregonte se fenomeni “El Niño” do të vazhdojë të forcohet dhe mund të ndikojë në prodhimin global të ushqimit. Ndërkohë, konfliktet gjeopolitike po çrregullojnë rrugët e transportit, po rrisin çmimet e plehrave dhe kostot e prodhimit, si dhe po shtojnë pasiguritë lidhur me sigurinë globale të ushqimit. 
Foto nga VCG
Ai tha se siguria ushqimore e Kinës mbështetet tek prodhimi i qëndrueshëm, rezervat e bollshme dhe kapaciteti i fuqishëm përpunues.
Sa i përket prodhimit, rendimenti i drithërave në Kinë është mbështetur nga përmirësimi i vazhdueshëm i kapaciteteve prodhuese dhe nga territori i gjerë i vendit, i cili u mundëson rajoneve të ndryshme të kompensojnë luhatjet e korrjeve të njëri-tjetrit, tha Liu.
Prodhimi vjetor i drithërave në Kinë ka qëndruar mbi 650 milionë tonë që nga viti 2015, duke kaluar shifrën prej 700 milionë tonësh për herë të parë në vitin 2024 dhe duke arritur në 715 milionë tonë në vitin 2025. Sasia e drithërave për frymë ka kaluar 500 kg – shifër më e lartë se mesatarja globale – duke krijuar një bazë të fortë për sigurinë ushqimore të vendit. 
Foto nga VCG
Sa u përket rezervave, raporti i Kinës midis stoqeve të drithërave dhe konsumit mbetet shumë mbi pragun ndërkombëtar të sigurisë së drithërave, që është 17% deri në 18%, tha Liu. Nëse ndodhin luhatje jonormale të tregut, rezervat mund të përdoren për të rregulluar ofertën dhe kërkesën, si dhe për të ndihmuar në stabilizimin e tregut të drithërave.
Kina zotëron gjithashtu kapacitete të fuqishme për përpunimin e drithërave. Vendi ka rreth 24.000 ndërmarrje që merren me përpunimin e drithërave dhe vajrave ushqimorë, prodhimin e ushqimeve dhe erëzave, si dhe me përpunimin e ushqimit për kafshë e përpunimin e thelluar, ndër aktivitete të tjera. Kapacitetet për përpunimin e miellit, orizit dhe vajit ushqimor, janë të mjaftueshme për të përmbushur kërkesën e brendshme, tha Liu.
