Prindërit e viktimave të zjarrit në diskotekën “Puls”, të mbështetur nga qytetarët, sot marshuan për herë të 49-të për engjëjt e tyre. Në rrugët e Koçanit ata dolën me transparente në formë zemre, në të cilat ishin shkruar emrat e të gjithë atyre që humbën jetën më 16 mars të vitit të kaluar.
Në rrethrrotullimin në bulevardin “Stevo Teodosievski”, ata ndezën qirinj, duke theksuar në këtë mënyrë se sot bëhen saktësisht një vit e gjysmë nga tragjedia.
Ndryshe nga marshimet e mëparshme, këtë herë prindërit patën vetëm një fjalim – para Gjykatës, i cili zgjati më shumë se dhjetë minuta. Reagimi më i fortë ishte lidhur me faktin se pronarit të “Puls”-it, Dejan Jovanovit, së shpejti i skadon një vit paraburgim nga ngritja e aktakuzës ndaj tij, si dhe me faktin se është ofruar pasuri si garanci për lirimin e tij nga paraburgimi.
“Vetëm dy ditë para këtij marshi, nga mbrojtja e Dekos dëgjuam se paraburgimi nuk mund të vazhdojë ‘përveç nëse shpiket një vepër e re penale’ dhe se, nëse do të kishte ndonjë vepër tjetër, deri tani do të kishte nisur procedurë. Në të njëjtën kohë, ofrohet edhe pasuri si garanci për lirimin e tij nga paraburgimi. Dhe pikërisht fjala ‘garanci’ dhemb veçanërisht. Ndërsa ne, prindërit, pyesim: Kush ua garantoi sigurinë fëmijëve tanë kur hynë në ‘Puls’?”, tha Valentina Hristovska, nëna e të ndjerit Pavel Hristovski.
Sipas saj, fëmijët e tyre kishin të drejtë të besonin se objekti ku hynin ishte i sigurt dhe se institucionet paraprakisht i kishin kontrolluar kushtet për funksionimin e tij.
Përmes fjalimit të Hristovskës, prindërit kërkuan që të hetohen të gjitha rrethanat lidhur me funksionimin e “Puls”-it, rikonstruksionin e objektit, ndryshimin e destinimit në kabare, dhënien e licencës, kontrollet e kryera, funksionimin financiar, regjistrimin e koncertit, futjen e mjeteve piroteknike, kapacitetin e objektit, si dhe deklaratat e dhëna gjatë gjykimit se për kontrollet inspektuese kishte njoftime paraprake para se autoritetet kompetente t’i kryenin ato.
Duke folur para Gjykatës Themelore të Koçanit, Hristovska theksoi se ata, si prindër, nuk konsiderojnë se duhet të vendosin se kush duhet të jetë në paraburgim dhe kush në liri.
“Për paraburgimin le të vendosë Gjykata, sipas ligjit dhe provave. Por kërkojmë që ligji të jetë garanci – garanci që asnjë lëshim të mos mbetet pa u verifikuar, asnjë paligjshmëri të mos heshtet dhe asnjë përgjegjësi të mos mbetet pa u shqyrtuar”, porositi nëna e të ndjerit Pavel.
Në fund të fjalimit të saj, Hristovska paralajmëroi se prindërit do të vazhdojnë të kërkojnë përgjigje dhe përgjegjësi.
“Fëmijët tanë sot nuk mund të flasin. Ne jemi zëri i tyre. Dhe derisa të marrim të gjithë të vërtetën – ky zë nuk do të heshtë”, tha ajo me vendosmëri.
Marshi i 49-të për engjëjt filloi nga Parku i Revolucionit dhe vazhdoi përmes urës pranë Qendrës Tregtare. Ndalime u bënë edhe para objekteve të Drejtorisë së të Ardhurave Publike dhe policisë. përcjell Zhurnal.mk .
