Sulmet iraniane kanë shkaktuar dëme të mëdha në bazat amerikane në Lindjen e Mesme, duke dëmtuar avionë, ndërtesa dhe infrastrukturë ushtarake, sipas fotografive të bëra nga ushtarë amerikanë dhe të publikuara nga rrjeti televiziv CBS News.
Fotot, të siguruara nga pjesëtarë të forcave të armatosura amerikane që kanë kërkuar të mbeten anonimë, tregojnë dëme në një bazë në Arabinë Saudite dhe në dy baza të tjera në Kuvajt. Në pamje shihen një avion i dëmtuar, tenda të grisura dhe kasolle të shkatërruara.
“Ky është dëm serioz në bazat tona, për të cilin publiku amerikan nuk është informuar”, tha një prej burimeve për CBS News.
“Ne po qëndrojmë atje, me sytë mbyllur, duke u goditur në fytyrë”, shtoi ai.
Të dhënat për dëmet janë përfshirë edhe në një raport të publikuar të hënën nga Inspektori i Përgjithshëm i Pentagonit. Sipas raportit, Komanda Qendrore e SHBA-së (CENTCOM) ka raportuar dëme të konsiderueshme në objektet amerikane si pasojë e sulmeve iraniane.
Sulmet kanë dëmtuar ose shkatërruar qindra ndërtesa dhe objekte infrastrukturore në bazat amerikane në Kuvajt, Bahrein, Katar, Emiratet e Bashkuara Arabe, Arabinë Saudite, Irak, Oman dhe Jordani.
Raporti thekson gjithashtu se dhjetëra avionë amerikanë janë shkatërruar ose dëmtuar.
Sipas dokumentit të Pentagonit, lufta në Iran i kishte kushtuar Uashingtonit rreth 33.4 miliardë dollarë deri në fund të qershorit. Kjo shifër, megjithatë, nuk përfshin kostot që lidhen me riparimin e infrastrukturës së dëmtuar në bazat amerikane.
