Rezultati i zgjedhjeve parlamentare në Suedi mbetet ende i pasigurt, me bllokun e së majtës që kryeson me diferencë të vogël ndërsa numërimi i votave po vazhdon, ka raportuar të hënën (14.09.2026) BBC.
Me më shumë se 90% të votave të numëruara në orët e para të së hënës, blloku i së majtës është në epërsi me rreth 20 mijë vota.
Llogaritjet paraprake nga autoriteti zgjedhor i Suedisë parashikonin se Magdalena Andersson e Socialdemokratëve ka gjasa ta mbyllë garën me shumicë prej tre mandatesh më shumë krahasuar me koalicionin rival prej katër partish, të udhëhequr nga kryeministri aktual konservator, Ulf Kristersson.
Në orët e para të së hënës, Kristersson ka deklaruar se mbetet e paqartë se kush do ta formojë qeverinë e ardhshme. “Votuesit e kanë thënë fjalën e tyre, por ende nuk kemi një rezultat përfundimtar. Cila qeveri do ta udhëheqë Suedinë në vitet e ardhshme mbetet ende një çështje e hapur,” u ka thënë ai mbështetësve.
Asnjë media kryesore nuk ka shpallur ende një fitues.
Suedia përdor sistem zgjedhor të shpërndarjes së mandateve, një metodë e përfaqësimit proporcional për të zgjedhur “mandatet” ose “vendet” në Riksdag – parlamentin suedez. Një parti ka nevojë për të paktën 4% të votave për ta kaluar pragun në parlament.
Me 94% të votave të numëruara, blloku i së majtës i udhëhequr nga Socialdemokratët kryeson me 176 mandate, krahasuar me 173 mandatet e bllokut të së djathtës.
Numërimi do të vazhdojë të mërkurën, përpara se rezultatet përfundimtare të përcaktojnë se cila palë ka rrugë më të qartë drejt shumicës. Numërimi rifillon atëherë për të përfshirë votat e hershme që u dorëzuan me vonesë, si dhe votat nga jashtë vendit që nuk mbërritën para ditës së zgjedhjeve.
Suedia ka dy blloqe kryesore politike që përfshijnë katër parti në të djathtë dhe katër në të majtë – çka do të thotë se qeveritë e koalicionit dhe ato të pakicës janë relativisht të zakonshme.
