E Majta e akuzon Qeverinë për jotransparencë dhe mospërputhje në procedurën për organizimin e festimit me rastin e jubileut të pavarësisë, duke vlerësuar se sqarimet shtesë lidhur me ngjarjen hapin pyetje të reja.
Nga partia theksojnë se afati për dorëzimin e ofertave ka skaduar më 8 maj në orën 12:00, ndërsa, sipas tyre, është dorëzuar vetëm një ofertë prej rreth njëqind faqesh. Vetëm katër ditë më vonë, më 12 maj, Qeveria dhe “Avalon” e kanë paralajmëruar programin dhe performancën e David Guettës.
E Majta pyet se si, brenda një afati kaq të shkurtër, ka qenë e mundur të hapet dhe të kontrollohet dokumentacioni, të zhvillohet vlerësimi, të vlerësohet arsyeshmëria financiare dhe prodhuese e ofertës dhe të merret vendim për përzgjedhjen e realizuesit.
Nga partia theksojnë gjithashtu një, siç e quajnë ata, mospërputhje ndërmjet kushteve të thirrjes publike dhe deklaratave të kryetarit të Komisionit, Nikollçe Micievskit. Sipas thirrjes publike, Komisioni duhej ta zhvillonte procedurën, ta vlerësonte ofertën dhe të përgatiste raport me propozim për përzgjedhjen, ndërsa Micievski, sipas të Majtës, më vonë e ka përshkruar rolin e Komisionit vetëm si kontroll të plotësisë dhe respektimit të afatit për dorëzimin e dokumenteve.
E Majta e ngre më tej çështjen e rolit të Micievskit, i cili ka kryesuar Komisionin që e ka shqyrtuar ofertën, ndërsa më vonë është angazhuar si autor i aranzhimeve për koncertin e Hose Carrerasit.
Nga partia kërkojnë që të publikohen raporti i plotë i Komisionit, procesverbalet nga puna e tij, vlerësimet individuale nëse ekzistojnë, arsyetimet për kriteret, vendimi për përzgjedhjen, data e njoftimit të realizuesit të përzgjedhur, si dhe e gjithë kronologjia kohore nga dorëzimi i ofertës deri te njoftimi zyrtar i programit. “Nëse e gjithë kjo ka qenë plotësisht e pastër, atëherë nuk ka asnjë arsye që dokumentet të mbeten pas dyerve të mbyllura”, theksojnë nga E Majta, duke shtuar se opinioni duhet të ketë qasje në procedurë për të përcaktuar nëse vërtet është bërë një vlerësim thelbësor i ofertës.
