Aplikacioni mobil m.Uslugi është përgatitur dhe aktualisht është në fazën e testimit. Ai nuk do të jetë i detyrueshëm për qytetarët dhe ata do të mund të vazhdojnë t’i përdorin dokumentet fizike ekzistuese.
Aplikacioni do të përmbajë dokumentet personale të qytetarëve në formë elektronike, ndër të cilat letërnjoftimin dhe patentë shoferin, ndërsa në fazën fillestare përmes tij do të jenë të disponueshme edhe disa shërbime elektronike të administratës publike.
– Premtova se në gjysmën e dytë të mandatit do të arrijmë të përgatisim një aplikacion mobil. Tani më në fund mund të them se ai është gati dhe aktualisht po e testojmë. Në tetor do të organizojmë një ngjarje të madhe, ku do ta prezantojmë para qytetarëve, theksoi Andonovski në emisionin “Me mes rreshtave” në Alfa TV.
Ai shpjegoi se m.Uslugi është konceptuar si një vend i vetëm përmes të cilit qytetarët do të mund të kenë qasje në dokumentet e tyre dhe në shërbimet e shtetit.
– E konceptojmë si një aplikacion që do t’ju nevojitet për gjithçka që dëshironi të përfundoni dhe që lidhet me shtetin. Aktualisht ekzistojnë disa aplikacione dhe sisteme të ndryshme, ndërsa qëllimi ynë është që shërbimet për qytetarët t’i bashkojmë në një vend. Për fillim, në aplikacion do të jenë të disponueshme patenta elektronike e shoferit dhe letërnjoftimi elektronik, si dhe disa shërbime elektronike të administratës publike, tha Andonovski.
Aplikacioni është zhvilluar në kuadër të një projekti me vlerë 1.5 milionë euro, të siguruar në bashkëpunim me institucionet kompetente të Polonisë dhe Ukrainës dhe me Bashkimin Evropian.
“Shteti nuk e ka paguar zhvillimin e aplikacionit. Bëhet fjalë për një projekt të madh që e sollëm në vitin 2024, në bashkëpunim me ministritë polake dhe ukrainase dhe me Bashkimin Evropian. Aplikacioni është zhvilluar nga inxhinierë maqedonas, është produkt maqedonas dhe mbetet në pronësi të shtetit”, tha Andonovski.
Ai paralajmëroi se versioni i parë i m.Uslugi do të përditësohet vazhdimisht me përmbajtje dhe funksionalitete të reja, me synimin përfundimtar që aplikacioni të shndërrohet në një portofol digjital evropian.
“Ky është versioni i parë dhe është e pritshme që të ketë hapësirë për përmirësim. Por ne tashmë po mendojmë për versionin e dytë, i cili do të përmbajë më shumë funksionalitete dhe gradualisht do të shndërrohet në një portofol të vërtetë digjital. Qëllimi përfundimtar, i përcaktuar edhe në Agjendën e Reformave, është që deri në vitin 2028 ai të bëhet portofol digjital evropian. Me këtë, Maqedonia do të jetë ndër rreth pesëmbëdhjetë shtetet e para evropiane me një aplikacion të tillë modern”, përfundoi Andonovski.
Ai tha se ende ka institucione që nuk i pranojnë dokumentet elektronike të qytetarëve, edhe pse kjo është detyrim i tyre ligjor.
“Për personat juridikë, përkatësisht institucionet që nuk do ta respektojnë ligjin, do të pasojnë gjobat e parashikuara. Në periudhën e ardhshme, kjo do të jetë objekt i mbikëqyrjes nga inspektorati kompetent. Kemi lënë kohë dhe hapësirë të mjaftueshme për përshtatje, por tani duhet ta respektojmë ligjin dhe të jemi në hap me botën”, theksoi Andonovski.
