Ministria e Punëve të Brendshme dhe Ministria e Shëndetësisë po shqyrtojnë mundësinë për një qasje të re në luftën kundër trafikimit të paligjshëm të drogës dhe substancave psikotrope. Kjo çështje u diskutua në një takim të ministrit të Punëve të Brendshme, Pançe Toshkovski, dhe ministrit të Shëndetësisë, Sasho Klekovski, me shefin e Zyrës së Kombeve të Bashkuara për Drogat dhe Krimin (UNODC) në Shkup, Uktam Nasirov.
Takimi, i zhvilluar sot në ambientet e MPB-së me iniciativë të ministrit Toshkovski, kishte në fokus mundësitë për përmirësimin e mënyrës së trajtimit të rasteve që lidhen me drogën, si dhe forcimin e bashkëpunimit ndërmjet institucioneve.
Një nga temat kryesore ishte avancimi i kornizës ligjore dhe shqyrtimi i praktikave që zbatohen në vende të tjera evropiane. Sipas diskutimeve, në të ardhmen mund të merret në konsideratë një qasje ku trajtimi juridiko-penal i rasteve do të përcaktohej në varësi të llojit dhe sasisë së drogës së gjetur, por edhe rrethanave konkrete të secilit rast.
Kjo do të nënkuptonte që raste të caktuara të mos trajtohen automatikisht në të njëjtën mënyrë, por të bëhet dallim në varësi të rrezikshmërisë dhe karakteristikave të rastit.
Në takim është theksuar gjithashtu nevoja për një bashkëpunim më të ngushtë me organet e drejtësisë, por edhe për përfshirjen më të madhe të institucioneve shëndetësore në trajtimin e personave që përballen me varësi nga droga.
Ministrat Toshkovski dhe Klekovski kanë vlerësuar se lufta kundër drogës nuk duhet të mbështetet vetëm në veprimin policor dhe ndjekjen penale, por duhet të përfshijë edhe parandalimin, ndërgjegjësimin e publikut, trajtimin shëndetësor dhe mbështetjen për personat me varësi.
Në këtë drejtim, është diskutuar edhe mundësia e shfrytëzimit të ekspertizës dhe përvojës së UNODC-së përmes debateve profesionale dhe publike, aktiviteteve për ngritjen e vetëdijes për pasojat e përdorimit të drogës, si dhe shkëmbimit të përvojave me vende të tjera.
Pjesë e bisedimeve ishte edhe mbështetja për Observatorin Kombëtar për Drogat dhe Varësitë, si dhe forcimi i bashkëpunimit me Agjencinë e Bashkimit Evropian për Drogat.
Përfaqësuesi i UNODC-së në Shkup, Uktam Nasirov, e ka pritur pozitivisht iniciativën dhe ka shprehur gatishmëri për vazhdimin e bashkëpunimit, shkëmbimin e ekspertizës dhe shqyrtimin e praktikave më të mira nga rajoni dhe vendet evropiane.
Nga takimi është nxjerrë përfundimi se përballja me problemin e drogës kërkon një qasje të kombinuar: veprim të fuqishëm ndaj rrjeteve kriminale që merren me trafikim, masa parandaluese dhe ndërhyrje të përshtatshme shëndetësore për personat që kanë probleme me varësinë.
Për momentin, bëhet fjalë për diskutime dhe shqyrtim të mundësive për ndryshimin e qasjes, ndërsa detajet eventuale për ndryshime ligjore do të duhet të përcaktohen në një proces të mëtejshëm institucional.
