“Dëshmitë tregojnë qartazi se mbrojtja e fëmijëve në epokën dixhitale kërkon ligje më të rrepta, shërbime më të mira, mjedise online më të sigurta dhe biseda të hapura me fëmijët”.
Një në dhjetë fëmijë, ose afërsisht 12.000 fëmijë të moshës nga 12 deri 17 vjeç të cilët përdorin internet në Maqedoninë e Veriut, kanë qenë të ekspozuar ndaj shfrytëzimit dhe abuzimit seksual të mundësuar nga teknologjia. Sipas raportit më të ri të “Disrupting Harm”, ekziston nevoja urgjente për sisteme më të fuqishme për parandalimin, mbrojtjen dhe mbështetjen e fëmijëve. Në bazë të këtij raporti, pasojat për fëmijët e prekur janë të thella, duke bërë të nevojshme mbështetje në kohë dhe shërbime të përshtatura sipas nevojave të tyre. Fëmijët e ekspozuar ndaj shfrytëzimit dhe abuzimit seksual të lehtësuar nga teknologjia kishin 11 herë më shumë gjasa të vetëlëndoheshin dhe 12 herë më shumë gjasa të përjetonin mendime ose sjellje vetëvrasëse krahasuar me fëmijët që nuk kishin përjetuar abuzim të tillë.
Profesionistët që punonin me fëmijët përshkruan efekte afatgjata, duke përfshirë turpin, humbjen e kontrollit, çrregullimet e gjumit, stresin dhe frikën se materiali që përshkruante abuzimin do të mbetej online përgjithmonë. “Pas çdo statistike në këtë raport qëndron një fëmijë, besimi i të cilit është humbur, siguria e të cilit është cenuar dhe mirëqenia e të cilit është dëmtuar. Ajo që e bën këtë studim kaq të rëndësishëm nuk është vetëm fakti se ai mat përmasat e problemit për herë të parë, por edhe se pasqyron zërat dhe përvojat reale të vetë fëmijëve dhe të rinjve. Dëshmitë tregojnë qartazi se mbrojtja e fëmijëve në epokën dixhitale kërkon ligje më të rrepta, shërbime më të mira, mjedise online më të sigurta dhe biseda të hapura me fëmijët “, tha Lesley Miller, përfaqësuese e UNICEF-it.
Pothuajse gjysma e fëmijëve të prekur (48 për qind) përjetuan më shumë se një formë abuzimi gjatë vitit para se t’u nënshtroheshin anketimit. Më shumë se gjysma e incidenteve të regjistruara lidheshin me rrjetet sociale, ndërsa pothuajse një e treta ndodhën përmes lojërave në internet. Studimi gjithashtu tregon se djemtë dhe vajzat u prekën në të njëjtën masë, pa dallime të theksuara për sa i përket gjinisë, moshës, vendbanimit, aftësive dixhitale apo nivelit arsimor të prindërve.
Në kundërshtim me perceptimin se shfrytëzimi seksual në internet kryhet kryesisht nga të panjohur, hulumtimet kanë treguar se pothuajse katër në pesë fëmijë (78 për qind) kanë rënë pre e abuzimit nga dikush që e njihnin. Më shumë se gjysma e autorëve ishin të rritur (57 për qind). Shpeshherë, autorët ishin partnerë intimë të mëparshëm ose aktualë, apo individë për të cilët fëmija kishte interes romantik (39 për qind e rasteve), si dhe anëtarë të familjes, të cilët ishin të përfshirë në më shumë se një të katërtën e rasteve (27 për qind). “Ky raport na ndihmon të kuptojmë situatën reale në shoqërinë tonë – si sillen të rinjtë në internet, cilat janë rreziqet më të shpeshta dhe ku duhet të ndërhyjnë institucionet në mënyrë më efektive. Ai ofron udhëzime për forcimin e kornizës ligjore, mbështetjen e profesionistëve që punojnë me fëmijët dhe përmirësimin e mekanizmave praktikë për parandalim dhe mbrojtje”, tha zëvendësministri i Punëve të Brendshme, Astrit Iseni.
Raporti tregon se, ndonëse teknologjia po e ndryshon natyrën e abuzimit, legjislacioni nuk ecën gjithmonë në hap me këto ndryshime. Ai vë në dukje disa boshllëqe ligjore që i lënë fëmijët të pambrojtur, veçanërisht ata të moshës 14 deri në 17 vjeç, dhe bën thirrje për reforma ligjore që të mbushin këto boshllëqe, të sigurojnë përgjegjshmërinë e autorëve dhe të vendosin masa mbrojtëse më të mira e të barabarta për mbrojtjen e të gjithë fëmijëve. Raporti “Disrupting Harm in North Macedonia” u realizua përmes një bashkëpunimi midis Zyrës së UNICEF-it për Vështrime Globale dhe Politika (Innocenti), ECPAT International dhe INTERPOL-it, me financim nga “Safe Online” dhe në bashkëpunim me Qeverinë e Maqedonisë së Veriut.
