E jashtëzakonshme, 15 ditë i bllokuar në shpellën nënujore, peshkatari 31-vjeçar gjendet i gjallë (VIDEO)

Një histori e jashtëzakonshme mbijetese po tërheq vëmendjen në Meksikë. Erasto Crisanto Valdez, 31 vjeç, është gjetur i gjallë pasi kishte kaluar rreth 15 ditë i bllokuar në një shpellë nënujore, në një thellësi prej afro 100 metrash, në zonën e San Francisco La Paz, në Oaxaca. Sipas raportimeve, ai ishte zhdukur më 23 korrik, ndërsa peshkonte së bashku me babain e tij.

Pas zhdukjes së tij, autoritetet meksikane nisën një operacion kërkimi, ndërsa zhytës të specializuar u përpoqën të eksploronin cenoten dhe shpellat nënujore. Më 29 korrik, zhytësit e Marinës meksikane gjetën edhe fuzhnjën e Valdezit në një thellësi prej rreth 90 metrash, por ai vetë nuk u gjet. Një ditë më vonë, kërkimi vijonte ende, ndërsa operacioni ishte përballur me kushte jashtëzakonisht të vështira.

Në ditët në vijim, zhytësit e Marinës kryen disa zhytje dhe kontrolluan shpellat nënujore deri në 120 metra thellësi. Më 31 korrik, autoritetet njoftuan për përfundimin e kësaj faze të kërkimit, pa e gjetur peshkatarin. Në atë moment, shpresat për ta gjetur gjallë ishin zbehur ndjeshëm dhe kërkimi po përqendrohej në gjetjen e tij pas më shumë se një jave.

Por, sipas raportimeve të fundit, fati i tij ishte krejt ndryshe. Një ekip ndërkombëtar eksploruesish nga Meksika, Gjermania, Shtetet e Bashkuara dhe Republika Dominikane arriti ta lokalizojë Valdezin brenda shpellës, ku ai kishte gjetur një hapësirë të vogël me ajër. Ky xhep ajri dyshohet se i dha mundësinë të merrte frymë dhe të mbijetonte për ditë të tëra në errësirë, lagështi dhe temperatura të ulëta.

Vetë Valdez e ka cilësuar mbijetesën e tij si një mrekulli. “Faleminderit Zotit që më dha edhe një mundësi në jetë dhe më lejoi të shoh përsëri fëmijët dhe familjen time”, mësohet të ketë deklaruar ai për NMás. Eksploruesi meksikan Carlos Jiménez e përshkroi gjithashtu operacionin si një “mrekulli”, duke thënë se “Zoti kishte plane të tjera” për 31-vjeçarin.

Pas nxjerrjes nga shpella, Valdez u transportua në sipërfaqe mbi një barelë dhe më pas u dërgua në spital. Raportohet se ai vuante nga dehidratimi i rëndë dhe kequshqyerja, pasi kishte kaluar më shumë se dy javë pa ushqim. Historia e tij vjen pas një operacioni kërkimi që zgjati ditë të tëra dhe përfshiu zhytje në një nga zonat më të vështira për t’u eksploruar në rajon.