Rusia është përfshirë nga një valë e gjerë sulmesh me dronë ukrainas gjatë natës. Ministria ruse e Mbrojtjes deklaroi se sistemet e mbrojtjes ajrore kanë rrëzuar dhe shkatërruar 456 dronë, të cilët, sipas Moskës, kishin në shënjestër rreth 15 rajone ruse dhe Krimenë e aneksuar.
Në Tatarstan, sulmet u përqendruan në qytetin industrial Nizhnekamsk, rreth 1,600 kilometra larg kufirit me Ukrainën. Autoritetet rajonale i cilësuan goditjet si “masive” dhe thanë se objektivat përfshinin zona industriale dhe civile.
Në rajonin e Belgorodit, në kufi me Ukrainën, autoritetet njoftuan se një grua u vra pasi një dron goditi një banesë në zonën e Novaya Tavolzhanka.
Sulmi i fundit vjen në një moment kur lufta Rusi-Ukrainë po shënon një përshkallëzim të sulmeve me rreze të gjatë. Pas më shumë se katër vitesh luftë, përpjekjet diplomatike mbeten në ngërç, ndërsa Moska dhe Kievi po shtojnë goditjet në territorin e njëri-tjetrit.
Sulmet me dronë kanë shkaktuar gjithnjë e më shumë viktima civile, ndërsa të dyja palët vazhdojnë të përdorin armë me rreze të gjatë për të goditur objektiva larg vijës së frontit.
