Arabia Saudite njoftoi se ka organizuar një takim ndërkombëtar në Riad për të finalizuar krijimin e një aleance shumëkombëshe të mbrojtjes detare, me synim garantimin e lirisë së lundrimit në Detin e Kuq dhe ngushticën Bab el-Mandeb, ndërsa të paktën 14 vende kanë shpallur mbështetjen e tyre për këtë nismë.
Në një deklaratë, Ministria saudite e Mbrojtjes bëri të ditur se në takimin e së enjtes morën pjesë shefa të shtabeve ushtarake dhe përfaqësues nga 43 shtete, si dhe një delegacion i Bashkimit Evropian, për të diskutuar mënyrat e forcimit të sigurisë së rrugëve detare ndërkombëtare dhe përballimin e kërcënimeve ndaj lundrimit dhe tregtisë globale.
Sipas deklaratës, në përfundim të takimit 14 vende nënshkruan një deklaratë të përbashkët, duke shprehur mbështetjen për aleancën. Ato janë: Arabia Saudite, Kuvajti, Bahrejni, Katari, Jordania, Egjipti, Pakistani, Turqia, Xhibuti, Somalia, Bangladeshi, Jemeni dhe Komoret.
“Dyert mbeten të hapura për shtete të tjera që dëshirojnë t’i bashkohen aleancës, pasi të përfundojnë procedurat e tyre kombëtare”, thuhet në deklaratën e ministrisë.
Ministria bëri të ditur se në takim u diskutua për kërcënimet në rritje ndaj sigurisë detare, përfshirë sigurinë e anijeve tregtare, cisternave të naftës dhe infrastrukturës detare. Gjithashtu u shqyrtuan mënyrat për forcimin e bashkëpunimit shumëpalësh në mbrojtje, me qëllim mbrojtjen e zinxhirëve të furnizimit dhe ekonomisë globale.
Pjesëmarrësit diskutuan edhe draftin e statutit të aleancës, strukturën organizative, mekanizmat e komandimit dhe kontrollit, si dhe mënyrën e funksionimit të saj në të ardhmen.
“Kjo synon krijimin e një kuadri institucional efektiv për bashkëpunim në përballjen me kërcënimet e përbashkëta detare në zonat që përfshijnë ngushticën Bab el-Mandeb, Detin e Kuq dhe Gjirin e Adenit”, shtoi ministria.
Sipas saj, pjesëmarrësit arritën mirëkuptim për finalizimin e procedurave të themelimit, përfshirë versionin përfundimtar të statutit të aleancës, si dhe plotësimin e strukturave organizative dhe rregullimeve teknike, duke hapur rrugën për nisjen zyrtare të aleancës dhe fillimin e operacioneve të saj.
“Aleanca përfaqëson një nismë ndërkombëtare të mbrojtjes, e hapur për të gjitha vendet që dëshirojnë t’i bashkohen, dhe synon të mbrojë lirinë e lundrimit, tregtinë globale, si dhe të forcojë sigurinë dhe stabilitetin rajonal e ndërkombëtar përballë kërcënimeve ndaj rrugëve detare ndërkombëtare”, thuhet më tej.
Ky zhvillim vjen në një kohë kur kërcënimet ndaj transportit tregtar në Detin e Kuq janë përshkallëzuar, pasi grupi Huthi i Jemenit shpalli më 20 korrik atë që e quajti një bllokadë detare ndaj Arabisë Saudite dhe më pas mori përgjegjësinë për sulme ndaj anijeve të lidhura me Arabinë Saudite.
Riadi është zotuar se do të mbrojë qarkullimin detar dhe do t’u përgjigjet çdo kërcënimi ndaj lundrimit ndërkombëtar.
