Zgjedhja e drejtuesit të sportit italian, Giovanni Malagò, për t’i besuar rindërtimin e Kombëtares italiane dyshes Roberto Mancini dhe Claudio Ranieri ka nxitur reagime të ashpra në prapaskenat e futbollit italian.
Presidentët e klubeve të Serie A kanë mbetur të befasuar dhe të zhgënjyer nga kjo lëvizje, duke e konsideruar procesin e vendimmarrjes joprofesional dhe të ndikuar nga lidhjet personale.
“Kombëtarja e klubeve private”
Sipas të përditshmes së njohur “Corriere della Sera”, reagimet e drejtuesve të klubeve elitare kanë qenë të drejtpërdrejta dhe mjaft kritike. Disa prej tyre e kanë cilësuar këtë lëvizje si “triumfin e frymës romane dhe të klubit ekskluziv Aniene” — duke iu referuar shoqërisë private kryeqytetase ku Malagò dhe Ranieri janë anëtarë prej vitesh. Kritikët nuk i kanë kursyer fjalët e rënda, duke e përkufizuar këtë vendim si një produkt të: “Miqësive të ngushta, lojërave të padelit dhe futbollit të kalçetos.”
Ajo që e shton edhe më shumë mllefin e Serie A është fakti se klubet kishin shprehur gatishmërinë e tyre të plotë për të mbështetur financiarisht ardhjen e Antonio Conte-s në stol. Mirëpo, ish-trajneri i Juventusit dhe Interit nuk u kontaktua asnjëherë seriozisht. Presidenti i Ligës Serie A, Simonelli, sqaroi se kontestimi nuk ka të bëjë me aftësitë teknike të Mancini-t, por me metodologjinë e përdorur nga Malagò, i cili veproi në mënyrë unilaterale pa u konsultuar me klubet që e kishin mbështetur atë.
Nga revolta te “paqja zyrtare”
Pavarësisht tensioneve të larta që përfshinë selinë e Ligës në Milano, institucioni zgjodhi rrugën e përgjegjësisë diplomatike përmes një komunikate zyrtare për shtyp. “Në emër të Ligës Serie A dhe në emrin tim personal, i uroj Roberto Mancini-t dhe Claudio Ranieri-t punë të mbarë në detyrat e tyre të reja,” u shpreh Simonelli. “Pas orësh intensive e jo të lehta, na mbetet vetëm të mbështesim zgjedhjen e bërë nga Presidenti Malagò. Është e rëndësishme të shikojmë përpara me sens përgjegjësie, unitet dhe frymë bashkëpunimi për ta rikthyer futbollin italian aty ku e meriton historia e tij.” Pavarësisht deklaratave zbutëse zyrtare, përplasja nxjerr në pah një krizë besimi mes klubeve kryesore të Serie A dhe drejtuesve të lartë të sportit italian.
