Trajneri italian arriti ta mbajë Tottenhamin në elitën e futbollit anglez vetëm në javën e fundit të sezonit të kaluar, duke e mbyllur kampionatin në vendin e 17-të pas një beteje të fortë për mbijetesë me West Hamin.
Pas shmangies së rënies nga liga, Spurs kanë afruar Jan Paul van Hecke, Andy Robertson, Marcos Senesi, Martin Dubravka, Mateus Fernandes dhe Sandro Tonali, me synimin që të mos gjenden më në një situatë të tillë këtë sezon.
Dy prej përforcimeve, Van Hecke dhe Senesi, janë mbrojtës qendre, gjë që mund ta vendosë Tottenhamin në pozitë për të lejuar largimin e kapitenit Cristian Romero nga “Tottenham Hotspur Stadium”.
Megjithatë, klubi ndoshta nuk e kishte parashikuar që ai mund të transferohej te njëri prej rivalëve të mëdhenj.
Raportimet nga Italia sugjerojnë se Arsenal dhe Chelsea po shqyrtojnë mundësinë e një transferimi befasues të reprezentuesit argjentinas.
Inter ishte lidhur më parë me Romeron, ndërsa Tottenham besohet se kërkon rreth 50 milionë euro (42 milionë funte) për kartonin e tij.
Sipas raportimeve, Inter preferon një marrëveshje huazimi me detyrim blerjeje, të ngjashme me atë që e dërgoi Manuel Akanjin nga Manchester City në Itali vitin e kaluar, duke shpresuar të paguajë rreth 25 milionë euro – gjysmën e shumës që kërkon aktualisht Tottenham.
“Corriere dello Sport” raporton se Romero do të ishte i hapur për një rikthim në Itali, katër vjet pasi u largua nga Atalanta për t’iu bashkuar Tottenhamit, me Interin që mbetet destinacioni i tij i preferuar.
Megjithatë, i njëjti raport thekson se Arsenal dhe Chelsea mund të përbëjnë kërcënimin më të madh për kampionët e Serie A në garën për nënshkrimin e kapitenit të Spurs.
Edhe pse do të dukej e pazakontë që Tottenham ta lejonte një transferim te njëri prej këtyre rivalëve londinezë, një lëvizje drejt Chelseat do të ishte befasuese, pasi “Blutë” janë pranë finalizimit të transferimit të Maxence Lacroix nga Crystal Palace.
Nga ana tjetër, Arsenal ka nevojë për një mbrojtës qendre, pasi William Saliba pritet ta humbasë fillimin e sezonit për shkak të një problemi në shpinë. Për këtë arsye, “Topçinjtë” mund të hyjnë në treg për të gjetur një zëvendësues.
Megjithatë, mbetet për t’u parë nëse Tottenham do ta konsideronte ndonjëherë shitjen e kapitenit dhe njërit prej lojtarëve të tij më të rëndësishëm te rivali i përbetuar nga veriu i Londrës
Tottenham Hotspur ka qenë shumë aktiv në afatin kalimtar të verës, duke kërkuar t’i japë Roberto De Zerbit mjetet e nevojshme për ta rikthyer klubin në pjesën e sipërme të tabelës së Premierligës dhe në garën për një vend në Evropë.
