Që prej krijimit të euros, Banka Qendrore Evropiane po planifikon ndryshimin e dizajnit të kartëmonedhave për herë të parë. Më 23 korrik, Banka Qendrore do të zbulojë dhjetë projektet finaliste që konkurrojnë për të zëvendësuar serinë e kartëmonedhave të lançuar që nga viti 2002. Ndërsa zgjedhja përfundimtare ende nuk është bërë, kjo shënon momentin kur qytetarët e Eurozonës do të kenë mundësinë të shohin idetë për pamjen e ardhshme të monedhës së tyre.
Presidentja e BQE-së, Christine Lagarde, tashmë i ka vlerësuar këto skica. Eurotower, përmes rrjeteve sociale, ka lajmëruar se qytetarët do të kenë mundësinë t’i shohin dhe të japin mendimin e tyre përmes një konsultimi publik, veçanërisht pasi komisioni i pavarur i ekspertëve ka dhënë pëlqimin e tij.
Procesi i përzgjedhjes përfshiu më shumë se 365 mijë qytetarë evropianë dhe ekspertë nga zona e Euros, dhe u reflektua në idetë paraqitura nga Lagarde, të cilat vlerësojnë diversitetin dhe trashëgiminë e përbashkët evropiane.
Nëse tema e kulturës evropiane zgjidhet, kartëmonedhat do të përfshijnë figura të njohura historike si Maria Callas në 5 euro, Beethoven në 10 euro, Marie Curie në 20 euro, Cervantes në 50 euro, Leonardo da Vinçi në 100 euro dhe Bertha von Suttner në 200 euro. Çdo kartëmonedhë do të pasqyrojë gjithashtu simbolika kulturore të rëndësishme.
Alternativa tjetër, e cila fokusohet tek ekosistemet natyrore, paraqet rrjedhën e lumenjve dhe zogj të ndryshëm që përfaqësojnë biodiversitetin e Evropës, së bashku me simbole të rëndësishme të BE-së si Parlamenti Evropian dhe Komisioni.
Përfundimi i projektit pritet deri në 2026, ku do të përcaktohen aspektet përfundimtare vizuale. Pas këtij procesi, do të nisë dizajni ekzekutiv dhe prodhimi i kartëmonedhave të reja, që do të përfshijnë teknologji të reja sigurie. Kjo shpreh përkushtimin e BQE-së për ruajtjen e kartëmonedhave fizike dhe promovimin e unitetit dhe qëndrueshmërisë evropiane.
