KurioziteteLajme
Ditëlindja e Punch, majmuni që pushtoi internetin feston 1-vjetorin në kopshtin zoologjik japonez
U bë i famshëm në mbarë botën kur u fotografua duke përqafuar një orangutang lodër, që e zëvendësonte nënën e tij. Tashmë, majmuni Punch feston ditëlindjen e parë në një kopsht zoologjik në Japoni, mes mijëra urimeve nga admiruesit.
Punch, makaku japonez që u kthye në një fenomen në rrjetet sociale vitin e kaluar, do të festojë të dielën ditëlindjen e tij të parë në kopshtin zoologjik të Ichikawa, në prefekturën Chiba. Kur ishte këlysh, Punch u rrit nga kujdestarët e kopshtit zoologjik dhe u bë i njohur në të gjithë botën pasi fotografitë dhe videot ku ai përqafonte një orangutang prej pelushi, si zëvendësim i nënës së tij, u bënë virale.
Sot, këlyshi është integruar plotësisht me komunitetin e makakëve. Orangutangun prej pelushi e mban ende në dhomën e tij, por nuk e merr më me vete kur del në ambientin e jashtëm.
Me rastin e ditëlindjes së parë, kopshti zoologjik ftoi admiruesit t’i dërgonin kartolina urimi. Kanë mbërritur mbi 2.500 mesazhe nga Japonia dhe vende të ndryshme të botës, rreth 1.000 prej të cilave janë ekspozuar për vizitorët. Në shumë prej tyre, fansat shkruajnë se historia e Punch u ka dhënë shpresë dhe frymëzim.
