Sekretari i Përgjithshëm i OKB-së, Antonio Guterres, është “thellësisht i alarmuar” nga vendimi i Izraelit për t’i dhënë statusin e qytetit vendbanimit të paligjshëm Givat Ze’ev, njoftoi zëdhënësi i tij.
“Sekretari i Përgjithshëm është thellësisht i alarmuar që autoritetet izraelite i kanë dhënë statusin e qytetit Givat Ze’evit, një vendbanim izraelit në Bregun Perëndimor të pushtuar, në veriperëndim të Jerusalemit”, deklaroi zëdhënësi Stephane Dujarric gjatë një konference për media të enjten.
Dujarric theksoi se “ky përcaktim administrativ nuk e ndryshon statusin ligjor të Givat Ze’ev sipas së drejtës ndërkombëtare, si pjesë e territorit të pushtuar palestinez.”
Ai ritheksoi se “vendbanimet izraelite në Bregun Perëndimor të pushtuar, përfshirë Jerusalemin Lindor dhe të gjithë infrastrukturën përkatëse, nuk kanë asnjë vlefshmëri ligjore dhe përbëjnë shkelje të hapur të së drejtës ndërkombëtare dhe të të gjitha rezolutave përkatëse të OKB-së.”
Gati 500 mijë kolonë izraelitë jetojnë në Bregun Perëndimor
Dujarric tha se vendbanimet izraelite mbeten një pengesë e madhe për arritjen e zgjidhjes me dy shtete dhe për një paqe të drejtë, të qëndrueshme dhe gjithëpërfshirëse.
Ai shtoi se kreu i OKB-së vazhdon t’i bëjë thirrje Izraelit të ndalojë të gjitha masat që lidhen me zgjerimin e vendbanimeve, në përputhje me rezolutat e Këshillit të Sigurimit.
Duke cituar Zyrën e OKB-së për Koordinimin e Çështjeve Humanitare (OCHA), Dujarric tha se sulmet e kolonëve izraelitë janë bërë shkaku kryesor i lëndimeve të palestinezëve në Bregun Perëndimor, duke përbërë 55 për qind të të gjitha lëndimeve gjatë vitit 2026.
“OCHA rithekson se palestinezët në Bregun Perëndimor duhet të mbrohen, ashtu siç kërkohet nga e drejta ndërkombëtare humanitare”, tha ai.
Sipas organizatës izraelite kundër vendbanimeve Peace Now, rreth 500 mijë kolonë izraelitë jetojnë në vendbanimet e paligjshme në Bregun Perëndimor të pushtuar, ndërsa 250 mijë të tjerë jetojnë në vendbanimet e ngritura në Jerusalemin Lindor të pushtuar.
OKB-ja ka përsëritur vazhdimisht se vendbanimet izraelite në territoret e pushtuara palestineze janë të paligjshme sipas së drejtës ndërkombëtare, duke paralajmëruar se ato minojnë mundësinë e arritjes së një zgjidhjeje me dy shtete.
Palestinezët këmbëngulin që Jerusalemi Lindor të jetë kryeqyteti i shtetit të tyre të ardhshëm, bazuar në rezolutat ndërkombëtare që nuk e njohin pushtimin izraelit të vitit 1967 dhe as aneksimin e qytetit në vitin 1980.
