Kopenhaga mori pikët maksimale në tri kategori – stabilitet, infrastrukturë dhe arsim, duke konfirmuar pozicionin e saj si një nga qytetet me cilësinë më të lartë të jetesës në botë
Kryeqyteti i Danimarkës, Kopenhaga, është renditur si qyteti më i jetueshëm në botë për vitin 2026, duke ruajtur vendin e parë për të dytin vit radhazi në indeksin vjetor të publikuar nga Economist Intelligence Unit (EIU). Kopenhaga arriti të lërë pas Vjenën e Austrisë, e cila kishte mbajtur vendin e parë për tre vite rresht para se të zbriste në pozitën e dytë vitin e kaluar. Raporti i EIU-së vlerësoi 173 qytete në mbarë botën bazuar në pesë kategori kryesore: stabilitetin, arsimin, kujdesin shëndetësor, infrastrukturën dhe kulturën me mjedisin. Kopenhaga mori pikët maksimale në tri kategori – stabilitet, infrastrukturë dhe arsim, duke konfirmuar pozicionin e saj si një nga qytetet me cilësinë më të lartë të jetesës në botë.
Sipas EIU-së, suksesi i vazhdueshëm i kryeqytetit danez lidhet me kombinimin e një infrastrukture të shkëlqyer, shërbimeve publike cilësore, sigurisë së lartë dhe një oferte të pasur kulturore. Australia dhe Zvicra vazhdojnë të dominojnë renditjen me nga dy qytete secila në mesin e dhjetë vendeve të para. Në Shtetet e Bashkuara, Nju Jorku u ngjit tri vende më lart, duke arritur pozitën e 66-të. Përmirësimi iu atribua uljes së kriminalitetit dhe perceptimit për rrezik më të ulët nga sulmet terroriste.
Megjithatë, Honolulu mbetet qyteti amerikan me renditjen më të mirë, duke u pozicionuar në vendin e 25-të, pavarësisht një rënieje prej dy pozitash krahasuar me vitin e kaluar. Në Amerikën e Veriut, vetëm Vankuveri i Kanadasë arriti të hyjë në mesin e dhjetë qyteteve më të jetueshme në botë. Ndërkohë, Azia regjistroi përmirësime të dukshme, veçanërisht në sektorin e shëndetësisë. Rezultati mesatar i jetueshmërisë për qytetet aziatike u rrit në 73.9 pikë. Ekspertët e EIU-së theksuan se përmirësimet në sistemin shëndetësor të Kinës dhe investimet shtesë në kujdesin mjekësor ndikuan pozitivisht në renditjen e qyteteve kineze. Raporti evidenton gjithashtu se konfliktet dhe pasiguria vazhdojnë të ndikojnë negativisht në cilësinë e jetesës në disa rajone.
Pasojat e tensioneve dhe luftës me Iranin reflektuan ulje të pikëve për stabilitet në disa qytete të Gjirit Persik. Kryeqyteti i Omanit, Maskati, pësoi rënien më të madhe duke humbur 14 pozita, ndërsa Kuvajt City ra me 12 vende. Në fund të listës mbetet Damasku i Sirisë, i cili vazhdon të konsiderohet qyteti më pak i jetueshëm në botë. Gjithashtu, Teherani i Iranit dhe Kievi i Ukrainës shënuan rënie në renditje për shkak të situatës së sigurisë dhe konflikteve.
Sipas EIU-së, rezultati mesatar global i jetueshmërisë mbeti pothuajse i pandryshuar krahasuar me vitin e kaluar, pasi përmirësimet në shëndetësi në Azi u kompensuan nga rënia e stabilitetit në Lindjen e Mesme. Raporti vlerëson se qytetet që investojnë në siguri, infrastrukturë, shëndetësi dhe arsim vazhdojnë të ofrojnë standardet më të larta të jetesës për banorët e tyre. Në vendin e parë renditet Kopenhaga e Danimarkës, e ndjekur nga Vjena e Austrisë në vendin e dytë. Melburni i Australisë zë vendin e tretë, ndërsa Sidnei i Australisë renditet i katërti. Në vendin e pestë është Cyrihu i Zvicrës, pasuar nga Gjeneva e Zvicrës në vendin e gjashtë. Osaka e Japonisë renditet në vendin e shtatë, Adelaide e Australisë në vendin e tetë, Vankuveri i Kanadasë në vendin e nëntë, ndërsa Tokio i Japonisë përmbyll listën në vendin e dhjetë.
