Kryeministri i Maqedonisë së Veriut, Hristijan Mickoski, gjatë një vizite në Ohër deklaroi se Qeveria do të vazhdojë investimet në projekte që synojnë përmirësimin e cilësisë së jetës së qytetarëve dhe zhvillimin e mëtejshëm të qytetit.
Ai vlerësoi punën e kryetarit të Komunës së Ohrit, duke theksuar se qyteti po zhvillohet dhe po merr gradualisht vendin që i takon si një nga qendrat më të rëndësishme turistike në vend.
Mickoski njoftoi se, nëse gjithçka zhvillohet sipas planit, në tremujorin e parë të vitit të ardhshëm pritet të vihet në funksion segmenti i autostradës Kërçovë–Ohër, ndërsa këtë vjeshtë pritet të hapet edhe segmenti Izvor–Vërbjani.
Sipas tij, përfundimi i këtyre projekteve do të shkurtojë kohën e udhëtimit drejt Ohrit nga disa qytete të vendit, duke krijuar kushte për rritjen e numrit të turistëve.
Kryeministri falënderoi këshilltarët komunalë, administratën lokale, deputetët nga Ohri dhe ministrat e Qeverisë për angazhimin e tyre në realizimin e projekteve zhvillimore. Ai veçoi edhe investimet në gjimnazin e qytetit, ku, sipas tij, po vazhdon rinovimi dhe përmirësimi i kushteve për nxënësit.
Në fund, Mickoski theksoi se Qeveria dhe pushteti lokal do të vazhdojnë të përqendrohen në realizimin e projekteve që sjellin vlerë të shtuar për qytetarët e Ohrit dhe të gjithë Maqedonisë së Veriut.Tetovasot
