Dhuna nga bashkëmoshatarët mund të ndalet vetëm nëse të gjithë, institucionet, mësuesit dhe e gjithë bashkësia, angazhohen me seriozitet të plotë. Megjithatë, roli i prindërve është veçanërisht i rëndësishëm. Shumë familjeve u mungon kujdesi dhe përkushtimi më i madh ndaj fëmijëve të tyre. Jo të gjithave, por shumë familjeve u mungon pikërisht ai komponent edukativ, i cili është baza për rritje të shëndetshme, tha Ministrja e Arsimit dhe Shkencës, Vesna Janevska, para panelit edukativ për prindërit dhe kujdestarët e nxënësve me temë dhunën nga bashkëmoshatarët, i cili u mbajt sot në Shtëpinë e Kulturës “11 Tetori” në komunën e Gazi Babës.
“Rasti i fundit i dhunës nga bashkëmoshatarët tregoi tek fëmijët mungesë empatie dhe vlera të shtrembëruara. Disa e shpërthejnë dhunën ndaj një fëmije, ndërsa të tjerë qëndrojnë mënjanë, filmojnë dhe argëtohen, në vend që ta ndihmojnë dhe ta mbrojnë atë. Kjo dhunë është një alarm për të gjithë shoqërinë. Është rezultat i mungesës së marrëdhënies edukative midis prindërve dhe fëmijëve – tha Janevska, duke shtuar se pa angazhimin e prindërve, çdo iniciativë për t’u përballur me dhunën nga bashkëmoshatarët është e paefektshme.
Ministrja theksoi se pikërisht për këtë arsye janë iniciuar takime të drejtpërdrejta me prindërit dhe mësuesit, si ky i sotmi, në nivel kombëtar. Qëllimi është të paraqiten hapur problemet, të dëgjohen sfidat me të cilat përballen familjet dhe shkollat, si dhe të shkëmbehen ide dhe iniciativa për veprim të përbashkët kundër dhunës nga bashkëmoshatarët.
Paralajmëroi vendosmëri për t’u përballur me të keqen që të rriturit u imponojnë fëmijëve dhe një përgjigje rigoroze sistemike.
“Duhet të ketë përgjegjësi edhe për prindërit. Bisedova me ministrin e Punëve të Brendshme, do të pasojnë sanksione për të gjithë të përfshirët dhe prindërit e tyre. Shkaku më i zakonshëm i dhunës nga bashkëmoshatarët është dhuna në familje dhe neglizhenca ndaj fëmijëve”, paralajmëroi ajo.
Aktualisht, janë në procedurë parlamentare ndryshimet legjislative që parashikojnë gjoba për prindërit dhe kujdestarët e fëmijëve që zbulohen se kanë kryer dhunë ndaj bashkëmoshatarëve në shkollë.
Vitin e kaluar, Ministria e Arsimit dhe Shkencës përgatiti dhe zbatoi një sërë masash për përballje me dhunën midis bashkëmoshatarëve. Përmes ndryshimeve ligjore, ajo i detyroi shkollat të përfshijnë aktivitete në programet e tyre vjetore të punës për të promovuar mirëqenien e nxënësve, për t’i mbrojtur nga dhuna dhe abuzimi, për të parandaluar diskriminimin, për të përmirësuar komunikimin e të ngjashme.
“U përpunuar manuale për mësuesit për përballjen me dhunën fizike nga bashkëmoshatarët në shkolla dhe mbi raportimin e ngacmimeve kibernetike. Shërbimet profesionale në shkolla u forcuan duke punësuar staf aty ku kishte mungesë, ndërsa u kthyen edhe kujdestaritë e mësuesve gjatë pushimeve në korridore dhe oborret e shkollës”, qëndron në kumtesën e MASH.
Nga atje shtojnë se takimet me prindërit do të vazhdojnë, ndërsa po vazhdojnë edhe trajnimet për bashkëpunëtorët profesionalë për të njohur dhunën në familje përmes sjelljes së fëmijëve në shkollë, si dhe për të parandaluar transformimin e saj të mëtejshëm në dhunë ndërmjet bashkëmoshatarëve.
Deri më tani janë realizuar trajnime për bashkëpunëtorë profesionalë nga rreth 30 komuna në Maqedoni, në bashkëpunim me Odën e Psikologëve, Ministrinë e Punëve të Brendshme dhe Ministrinë e Politikës Sociale
