Ekspertët e mjekësisë kanë identifikuar disa lloje të ndryshme të dhimbjeve të kokës, të cilat dallohen nga njëra-tjetra në bazë të simptomave, kohëzgjatjes dhe shpeshtësisë së shfaqjes.
Sipas specialistëve, çdo lloj dhimbje koke ka karakteristikat e veta dhe mund të prekë çdo person në situata të ndryshme.
Një prej tyre është dhimbja e kokës si pasojë e sforcimit fizik, e cila shfaqet pas aktiviteteve fizike apo edhe pas të qeshurës së fortë. Kjo lidhet me rritjen e përkohshme të presionit në lëngjet e shtyllës kurrizore dhe zakonisht zgjat deri në një orë.
Një tjetër formë është dhimbja e kokës si pasojë e tensionit të gjakut, veçanërisht në rastet e hipertensionit. Ajo shpesh është më e theksuar në mëngjes dhe lokalizohet në pjesën e pasme të kokës.
Ekspertët përmendin gjithashtu dhimbjet e kokës si pasojë e inflamacionit, të cilat shfaqen më shpesh tek personat mbi 60 vjeç dhe mund të shoqërohen me dhimbje rreth veshëve dhe probleme me shikimin.
Një tjetër tip i rëndësishëm janë dhimbjet shokuese të nofullës, të cilat përshkruhen si dhimbje të forta me ndjesi “shoku elektrik” dhe mund të lidhen me nervat, enët e gjakut apo faktorë dentarë.
