Spekulimet që e lidhnin sulmuesin norvegjez Erling Haaland me projektin e Enrique Riquelmes kanë marrë një goditje të fortë pas zhvillimeve të fundit.
Sipas raportimeve të mediumit spanjoll Marca, agjentja e Haalandit, Rafaela Pimienta, ka kontaktuar personalisht presidentin e Real Madridit, Florentino Pérez, mbrëmjen e kaluar për të mohuar kategorikisht ekzistencën e ndonjë marrëveshjeje mes futbollistit dhe kandidatit për president të klubit madrilen, Enrique Riquelme.
Raporti thekson se Pimienta ka dashur të sqarojë situatën pas zërave që qarkulluan në mediat spanjolle dhe rrjetet sociale, ku pretendohej se Erling Haaland kishte arritur një akord me Riquelmen në rast se ky i fundit do të fitonte zgjedhjet presidenciale te Real Madrid.
Kontakti i drejtpërdrejtë me Perezin shihet si një përpjekje për të shmangur keqkuptimet dhe për të ndalur spekulimet që kanë marrë hov ditët e fundit rreth të ardhmes së sulmuesit të Manchester City.
Haaland vazhdon të mbetet një nga objektivat më të përfolur në tregun e transferimeve, ndërsa emri i tij shpesh lidhet me një kalim të mundshëm në Madrid. Megjithatë, sipas informacionit të fundit të publikuar nga Marca, nuk ekziston asnjë marrëveshje mes lojtarit dhe Enrique Riquelmes.
