Ministria e Administratës Publike ka përshëndetur deklaratën e Presidentit të Këshillit Evropian, Antonio Costa, i cili vlerësoi përparimin e Republikës së Maqedonisë në zbatimin e agjendës reformuese, duke veçuar reformën e administratës publike si një nga fushat me rezultate të prekshme.
Nga ministria theksojnë se ky vlerësim paraqet një njohje të rëndësishme për punën e bërë nga Qeveria dhe institucionet përgjegjëse në ndërtimin e një administrate profesionale, efikase, transparente dhe moderne, në përputhje me standardet evropiane.
Sipas njoftimit, gjatë periudhës së kaluar është punuar intensivisht në profesionalizimin e administratës, avancimin e menaxhimit të burimeve njerëzore, digjitalizimin e shërbimeve dhe krijimin e politikave që sigurojnë shërbime më cilësore për qytetarët dhe bizneset.
Ministria vlerëson se Strategjia për Reformën e Administratës Publike dhe vlerësimet pozitive nga partnerët evropianë janë rezultat i angazhimit të përbashkët të institucioneve të përfshira në procesin reformues.
Nga atje shtojnë se ky vlerësim përbën një motiv shtesë për vazhdimin e reformave, me qëllim krijimin e një administrate bashkëkohore në shërbim të qytetarëve dhe forcimin e kapaciteteve institucionale në rrugën drejt integrimit evropian.
“Çdo rezultat i arritur sot është një hap i ri drejt përmirësimit të standardit jetësor të qytetarëve dhe anëtarësimit të plotë në Bashkimin Evropian”, thuhet në kumtesën e Ministrisë së Administratës Publike.
