Presidenti amerikan Donald Trump ka sulmuar publikisht kryeministrin britanik Keir Starmer, duke e cilësuar si “jo të dobishëm” në lidhje me sulmet e SHBA-së ndaj Iranit.
Në një intervistë për The Sun, Trump u shpreh i zhgënjyer nga qëndrimi i Londrës.
“Nuk ka qenë i dobishëm. Nuk mendova kurrë se do ta shihja këtë nga ai. Nuk mendova kurrë se do ta shihja këtë nga Mbretëria e Bashkuar,” tha ai, duke shtuar se është “shumë e trishtueshme të shohësh që marrëdhënia padyshim nuk është ajo që ishte”.
Fillimisht, Mbretëria e Bashkuar nuk lejoi përdorimin e bazave të saj nga SHBA për sulme ndaj Iranit, por më pas hapi bazat për operacione që i cilësoi si “mbrojtëse”.
Në të njëjtën intervistë, Trump theksoi se Franca ka qenë “e shkëlqyer”, duke shtuar se “të gjithë kanë qenë të shkëlqyer”, përveç Mbretërisë së Bashkuar, e cila sipas tij “ka qenë shumë ndryshe nga të tjerat”.
Deklaratat e fundit sinjalizojnë një ftohje të marrëdhënieve mes Uashingtonit dhe Londrës, në një moment kritik për sigurinë ndërkombëtare dhe për koordinimin mes aleatëve perëndimorë.
