Kina ka ekzekutuar 11 anëtarë të bandës famëkeqe kriminale të familjes Ming, e akuzuar për drejtimin e qendrave të mashtrimit të ngjashme me mafian në Myanmar dhe për vrasjen e punëtorëve që përpiqeshin të arratiseshin. Lajmi u raportua nga media shtetërore kineze.
Personat e ekzekutuar ishin dënuar me vdekje në shtator, pasi u shpallën fajtorë për një sërë krimesh të rënda, përfshirë vrasje, ndalim të paligjshëm dhe mashtrim. Dy nga të dënuarit kishin apeluar vendimin, por Gjykata Supreme Popullore e Kinës e la dënimin me vdekje në fuqi.
Grupi kriminal, i udhëhequr nga Ming Xuechang, ishte prej kohësh i lidhur me kompleksin famëkeq “Crouching Tiger Villa” në Kokang, një rajon autonom në kufirin mes Mianmarit dhe Kinës. Në kulmin e veprimtarisë së tij, grupi kishte rreth 10 mijë persona që punonin për të kryer mashtrime dhe krime të tjera.
Pas viteve të tëra ankesash nga familjarët e punëtorëve të trafikuar dhe rritjes së vëmendjes së medias ndërkombëtare, Kina ndërhyri me masa të ashpra në vitin 2023. Në nëntor të atij viti, autoritetet kineze lëshuan urdhër-arreste për anëtarët e familjes Ming, duke ofruar shpërblime nga 14 mijë deri në 70 mijë dollarë për kapjen e tyre.
Në tetor 2023, katër persona u vranë gjatë një incidenti të dhunshëm në një kompleks mashtrimi, kur anëtarë të grupit dyshohet se hapën zjarr ndaj njerëzve që po transferoheshin nën roje të armatosura. Ngjarja ndodhi pasi grupi ishte paralajmëruar për një bastisje të mundshme policore.
