Teherani ka hedhur poshtë mundësinë e negociatave të barabarta me Shtetet e Bashkuara, pavarësisht se presidenti amerikan Donald Trump la të kuptohej javën e kaluar se dialogu mund të rikthehet.
Ministri i Jashtëm iranian deklaroi se qasja aktuale e Uashingtonit “nuk përmban asnjë shenjë gatishmërie për bisedime të ndershme”.
Deklaratat erdhën në sfondin e tensioneve të rritura, pas goditjes së Izraelit ndaj Iranit në qershor dhe sulmeve të mëvonshme amerikane mbi objektet bërthamore iraniane.
Përpjekjet për të ringjallur dialogun mbi programin bërthamor kanë mbetur të ngrira.
Uashingtoni, vendet evropiane dhe Izraeli akuzojnë Iranin se po e përdor programin e tij bërthamor si mbulesë për zhvillimin e armëve atomike, ndërsa Teherani këmbëngul se projektet e tij janë tërësisht paqësore.
Para konfliktit 12-ditor, palët kishin zhvilluar pesë raunde bisedimesh indirekte, por negociatat u bllokuan kryesisht për çështjen e pasurimit të uraniumit, që SHBA kërkon ta kufizojë.
“SHBA-të nuk mund të presin të marrin në tryezën e bisedimeve atë që nuk arritën ta fitonin në fushën e luftës,” deklaroi Abbas Araghchi gjatë konferencës “E Drejta Ndërkombëtare nën Sulm”, e mbajtur në Teheran. Ai shtoi se Irani mbetet i gatshëm për dialog, por “jo për negociata të diktuara”.
Në të njëjtën konferencë, zëvendësministri Saeed Hatibzadeh akuzoi Uashingtonin se po e shndërron procesin negociues në “një spektakël politik” për të avancuar objektivat e tij.
