Hegseth premtoi rikthim të disiplinës edhe te pamja e trupave. “Nuk do të ketë më mjekra, flokë të gjatë, apo shprehje individuale sipërfaqësore”, u shpreh ai. “Nëse doni mjekër, atëherë bashkohuni me forcat speciale”. Sipas tij, komandantët e mëparshëm kishin dështuar të ruanin standardet, duke lejuar “një ushtri që dukej si paganë nordikë”
Rreth një javë më parë, Sekretari i Mbrojtjes Pete Hegseth lëshoi një urdhër të paprecedentë: Ish-prezantuesi i Fox News u dha udhëzime komandantëve më të lartë të ushtrisë, afërsisht 800 gjeneralë dhe admiralë, të cilët janë të shpërndarë në të gjithë botën, që të vinin në Virxhinia. Shefi i Pentagonit, i shqetësuar, nuk u dha shumë vëmendje oficerëve dhe nuk shpjegoi pse po i thërriste. Shtëpia e Bardhë e karakterizoi këtë veprim si rutinë, por realiteti tregoi një histori shumë të ndryshme: hetimi i MSNBC nuk mundi të gjente asnjë rast tjetër në historinë amerikane në të cilin çdo gjeneral dhe admiral, i stacionuar në të gjithë planetin, të ishte thirrur në një takim të përbashkët.
REFORMA
Sekretari i Mbrojtjes i SHBA-së, Pete Hegseth, kritikoi ashpër ‘gjeneralët e shëndoshë” dhe iniciativat e larmishme që ai tha se çuan në dekada të tëra prishjeje në ushtri dhe i tha një takimi të rrallë komandantësh se duhet të jepnin dorëheqjen nëse nuk e mbështesnin axhendën e tij. ‘Udhëheqësit politikë budallenj dhe të pamatur vendosën drejtimin e gabuar të busullës dhe ne humbëm rrugën. Ne u bëmë ‘Departamenti i Zgjuar’,’ tha Hegseth ndërsa hapi eventin në Quantico, Virxhinia. ‘Por jo më,’ tha ai. Ai prezantoi dhjetë direktiva të reja, ku përfshihet rivendosja e standardeve të larta të fitnesit fizik për të gjithë trupat dhe për oficerët, duke nënvizuar se po e spastron ushtrinë nga “wokeness” dhe nga “burra me fustane”. “Mund të humbasim edhe njerëz të mirë”, tha Hegseth, por shtoi se vetëm ata që duan të jenë luftëtarë do të qëndrojnë.
PAMJA NË FOKUS
Hegseth premtoi rikthim të disiplinës edhe te pamja e trupave. “Nuk do të ketë më mjekra, flokë të gjatë, apo shprehje individuale sipërfaqësore”, u shpreh ai. “Nëse doni mjekër, atëherë bashkohuni me forcat speciale”. Sipas tij, komandantët e mëparshëm kishin dështuar të ruanin standardet, duke lejuar “një ushtri që dukej si paganë nordikë”. “Nëse dikush nuk arrin standardet mashkullore të luftës, nuk kalon testin fizik ose nuk respekton rregullat e pamjes, atëherë është koha për një post të ri ose një profesion të ri”, tha Hegseth. Në vijim, ai sulmoi trupat e mbipeshë në ushtri. “Është lodhëse të shohësh formacione me ushtarë të shëndoshë. Po ashtu, është krejtësisht e papranueshme të shohësh gjeneralë e admiralë të shëndoshë në korridoret e Pentagonit”, tha ai. Sipas tij, të gjithë trupat do të duhet të respektojnë kërkesat për peshë dhe gjatësi trupore, të kalojnë dy herë në vit testet fizike dhe të kryejnë ushtrime fizike çdo ditë në detyrë.
PLANET E TRUMP PËR USHTRINË
Donald Trump iu drejtua oficerëve të lartë ushtarakë pas Hegseth. Ai e filloi fjalimin e tij duke i inkurajuar udhëheqësit ushtarakë të mbledhur në takim të duartrokisnin lirshëm, por edhe të largoheshin nga salla nëse nuk ishin dakord me komentet e tij. Por shtoi se nëse largoheshin nga salla, “grada e tyre, e ardhmja e tyre, do të zhdukej”, sipas CBS . Ai tha se ishte zotuar të shpenzonte më shumë se 1 trilion dollarë për ushtrinë deri në vitin 2026. “Këto janë shumë para. Shpresoj t’ju pëlqejnë”, u tha ai udhëheqësve ushtarakë të mbledhur. SHBA-të kanë miratuar një buxhet prej 895 miliardë dollarësh për shpenzimet e mbrojtjes për vitin fiskal 2025. Trump tha gjithashtu se administrata e tij do ta zgjeronte Marinën Amerikane me 19 anije, duke përfshirë nëndetëse, shkatërrues dhe anije sulmi. Por ai shtoi se nuk i pëlqente pamja e disa prej anijeve, duke shtuar se “një anije nuk ka pse të jetë e shëmtuar”.
LUFTA SI MISION
Ndërkohë, Hegseth u tha qindra admiralëve dhe gjeneralëve të “përgatiteshin për luftë”, ndërsa njoftoi një rishikim të standardeve dhe ideologjisë. “Nga ky moment e tutje, misioni i vetëm i Departamentit të Luftës të sapokrijuar është ky: Lufta”, tha Hegseth në fjalimin e tij, duke iu referuar emrit që administrata Trump përdor tani për Departamentin e Mbrojtjes. “Duke u përgatitur për luftë dhe duke u përgatitur për fitore. Të paepur dhe të pakompromis në këtë ndjekje. Jo sepse duam luftë. Askush këtu nuk dëshiron luftë. Por sepse e duam paqen”, tha ai, siç raportohet nga Newsweek.
