Presidentja e Maqedonisë së Veriut, Gordana Siljanovska-Davkova, gjatë fjalimit të saj në Forumin e Liderëve Botërorë në Universitetin Columbia në SHBA, deklaroi se kërkesa për ndryshime kushtetuese që i bëhen vendit të saj nuk janë pjesë e kritereve të Kopenhagës, të cilat përcaktojnë kushtet për anëtarësim në BE, njofton Top24
Ajo e krahasoi rrugën e gjatë të vendit drejt Bashkimit Evropian me një maratonë që ndonjëherë duket si “pritje për Godonë” – duke theksuar se Maqedonia e Veriut ka marrë statusin e kandidatit që në vitin 2005, por ende nuk është bërë anëtare.
Mesazhe kyçe nga fjalimi:
-
Ballkani Perëndimor është pjesë e Evropës – gjeografikisht, historikisht dhe kulturalisht.
-
Procesi i zgjerimit të BE-së është rikthyer në agjendë, jo për të krijuar një union më të madh, por për shkak të sigurisë dhe stabilitetit, sidomos pas nisjes së luftës në Ukrainë.
-
Vendet e Ballkanit janë penguar në rrugën e tyre drejt BE-së për shkak të vetove të disa vendeve anëtare – në dallim nga vendet baltike që patën mbështetje nga fqinjët.
Kritikë ndaj Bashkimit Evropian:
Siljanovska-Davkova tha se BE sot është në krizë të liderëve dhe se ka devijuar nga vlerat që e karakterizonin më parë si simbol i demokracisë dhe sundimit të ligjit. Sipas saj:
-
Vetoja e vendosur ndaj Maqedonisë së Veriut nuk bazohet në kriteret e Kopenhagës, por në kërkesa politike e identitare nga një vend fqinj.
-
Kushtetuta e BE-së, ndonëse jo e kodifikuar në një dokument të vetëm, parashikon respektimin e identitetit kombëtar dhe kulturor – gjë që po shkelet në rastin e Maqedonisë së Veriut.
-
Ajo deklaroi se nuk është demokratike të kërkohen ndryshime në Kushtetutën e vendit të saj si kusht për anëtarësim, pasi legjitimiteti buron nga qytetarët, jo nga vullneti i vendeve të tjera.
Për Organizatat Ndërkombëtare dhe OKB-në:
-
Siljanovska-Davkova theksoi nevojën për reforma të thella në OKB, duke shtuar se pas 80 vjetësh është koha që një grua të jetë Sekretare e Përgjithshme e OKB-së.
-
Ajo kërkoi ndryshim të mënyrës së vendimmarrjes në OKB për të parandaluar konfliktet dhe jo vetëm për të reaguar pas tyre.
-
Krahasoi situatën me Lidhjen e Kombeve, duke paralajmëruar se nuk duhet lejuar që OKB të dështojë në mënyrë të ngjashme.
Dialog me studentët:
Pas ligjëratës, studentët bënë pyetje për:
-
Politikat e jashtme të Maqedonisë së Veriut,
-
Kushtetutën dhe sistemin e brendshëm politik të vendit,
-
Situatën në rajonin më të gjerë.
Siljanovska-Davkova tha se ndihej si njëherësh studente dhe profesoreshë, duke përmendur se gjithmonë ka praktikuar metodën sokratike të të mësuarit, duke mësuar edhe nga studentët.
