Në televizionin Sitel, në emisionin “Tema e ditës”, dje ishte i ftuar Ivica Tomovski, anëtar i Komitetit Qendror të VMRO-DPMNE-së, i cili u ndal te çështja e automjeteve zyrtare që duhet të kenë targa të veçanta me qëllim rritjen e transparencës dhe kontrollit në përdorimin e tyre, në mënyrë që qytetarët të mund t’i dallojnë lehtësisht dhe, nëse ka abuzim, t’i raportojnë.
Tomovski shpjegoi se një pjesë e automjeteve zyrtare janë jashtë përdorimit dhe do të shiten pas zgjedhjeve. Ai theksoi se në shifrën prej 7.500 automjetesh përfshihen edhe ato të MPB-së, MPJ-së, ASK-së, autoambulancat dhe të gjitha mjetet e tjera në pronësi të shtetit, duke nënvizuar se për funksionim normal nuk do të nevojiteshin më shumë se 2.000 automjete.Tomovski gjithashtu theksoi se është formuar një grup pune që do të shqyrtojë ndryshimin e rregullores në rast të dënimit për abuzim, dhe sqaroi se me përfundimin e procesit të regjistrimit të automjeteve do të vendosen GPS në automjete me qëllim minimizimin e abuzimeve.
“E kemi filluar formimin e një grupi pune mes Ministrisë së Punëve të Brendshme dhe Sekretariatit për Çështje Ligjore dhe Rregullore, dhe do të shqyrtohet ndryshimi i rregullores për të parë në kuadër të ligjeve të parashikuara nga shteti nëse ka hapësirë për të vepruar në drejtim të dënimeve në rast të abuzimit. Pres që kjo të përfundojë deri në fund të vitit, pasi deri atëherë MPB merr përsipër të krijojë regjistrin e automjeteve, ku do të përfshihen të gjitha automjetet shtetërore. Bashkë me hartimin e këtij regjistri do të mund të parashohim edhe ndryshimin e rregullores, që më pas të pasojnë dënimet për abuzimet e mundshme. Pasi të përfundojmë këtë proces, në bashkëpunim me MPB-në do të marrim një vendim qeveritar që të gjitha automjetet të pajisen me GPS – në mënyrë që abuzimet me automjetet të çrrënjosen sa më shumë që të jetë e mundur,” tha Tomovski.
