Ajri në Trubarevë ka përqendrime të monoksidit të karbonit prej 300 mg/m3, ndërsa vlera mesatare nuk duhet të kalojë 10 mg/m3. Vlerat e parametrave të tjerë ndotës janë tejkaluar gjithashtu, sipas rezultateve fillestare të matjes së gazrave në ajër nga mostrat e marra ditën e zjarrit në kompaninë F-Grupacija, transmeton Portalb.mk.
Drejtoresha e Inspektoratit Shtetëror të Mjedisit, Ivana Ginovska, informoi se të premten do të dihet se cilat metale të rënda janë të pranishme në ajër pas zjarrit. Mostrat u morën në të njëjtën ditë që shpërtheu zjarri, dhe përveç kësaj, kur të krijohen kushtet, do të kontrollohet uji dhe toka.
“Janë vendosur stacione matëse për të monitoruar nivelin ditor të cilësisë së ajrit për të ditur se sa të sigurt janë qytetarët pranë zjarrit”, tha Ginovska.
Dy stacione matëse të laboratorit Ambicon të UGD janë vendosur gjithashtu në vendin e zjarrit të madh, të cilët do të marrin mostra të grimcave 24 orë në ditë për pesë ditët e ardhshme, të cilat më vonë do të analizohen. Një stacion matës ndodhet rreth pesëdhjetë metra larg, dhe i dyti është rreth njëqind metra larg nga depoja e mbetjeve elektronike dhe riciklimit të plastikës të kompanisë F-Grupacija. Profesor Dejan Mirakovski njoftoi se rezultatet fillestare nga stacionet e matjes së cilësisë së ajrit duhet të jenë të disponueshme javën tjetër.
Kompania F-Grupacija, sipas drejtorit të Drejtorisë për mjedis jetësor, Igor Nikoski, kishte leje operimi të lëshuar në maj 2021 me një vlefshmëri prej pesë vjetësh dhe një raport mjedisor të miratuar nga shkurti 2021. Ajo punonte me mbetje nga pajisjet elektrike dhe elektronike, bateritë elektrike dhe akumulatorët. Sipas lejes, kompania mund të trajtonte deri në 20 ton mbetje jo të rrezikshme dhe deri në 500 kilogram mbetje të rrezikshme në një ditë, pra në 24 orë.
Zjarri në Trubarevë shpërtheu më 13 shtator në objektin e firmës “F-Grupacioni” e cila merret me mbeturina elektronike, janë përfshirë edhe dy objekte në të cilët ka pasur sasi e madhe e mbeturinave plastike. Nuk ka të lënduar në zjarr, por gjatë natës së kaluar deri në orët e pasdites, në rajonin e Trubarevës janë realizuar 13 intervenime nga Ndihma e Shpejtë, gjatë të cilave një person është transportuar në spital dhe është bërë transporti në një vendbanim tjetër i një personi të palëvizshëm.
